Seks toppar på éin dag
Bildeserie: Kvifor reisa til byfjella eller Hardangervidda for å gå i fjellet? Vi gjekk fjellrekka frå Svinningen til Midtsæterfjellet.
Bildeserie:
Ein treng ikkje reise langt for å oppleve storslått natur. Vi har den i vår eigen bakhage.
Midtsiden nytta ein av dei fine sommardagane til å gå fjellrekka frå Svinningen til Midtsæterfjellet. Heile seks toppar, frå Midtsæterfjellet på 604 moh til Svinningen på 842 moh, fekk vi med oss på turen.
Vi innrømmer det gjerne med éin gong, sjølv om turen var fantastisk i finvêret og naturopplevinga storslagen, så var den dryg.
16,08 km på 5 timar og 58 minutt logga Endomondo for oss. Nei, vi er ikkje i spesielt god form, men turen er likevel overkomeleg. Hugs berre godt med mat og drikke. Det gjorde ikkje vi ;-(.
Avtal skyss
Vi starta turen ved starthytta i Øvredalen, kor det òg er godt med parkeringsplassar for turgåarar, og enda ved gardane på Midtsæter.
Du kan køyra to bilar og plassera den eine ved Midtsæter, men det er dårleg med parkeringsplassar der, så vi rår deg i staden til å få nokon til å køyra deg om du vil sleppa å gå inn til Øvredalen etter fjellturen.
Dessutan var det godt å berre vera passasjer då turen var ved vegs ende..
Motiverande ord
Dei første par kilometrane er greie, i skogsterreng, til du kjem til porten til Svinningen, merka av Vildmarkens søn, Jimmy Øvredal.
Jimmy´en gjer òg sitt for at det neste stykket opp mot toppen skal gå lettare. Med ujamne mellomrom har han, sett opp små installasjonar, som BH-treet og Kjærringasteidn, og oppmuntrande ord og vers.
Etterkvart som du nærmar deg toppen blir det bratt, men ikkje verre enn at du klarar det om du tar deg tid og ein pust i bakken.
Vel oppe på det høgste fjellet i Os - Svinningen - får du ei fantastisk utsikt innover mot Kvamsskogen, Gullfjellet og utover mot fjorden og Fusa-landet.
Ta deg ein dukkert
Frå Svinningen går turen på ein relativt grei markert sti i retning Midsæterfjellet via Søtefjellet (769 moh), ein ikkje namngjeven topp på 729 moh, Sauskolten (732 moh) og Rindafjellet 715 moh.
Innimellom kan det vera at du mistar stien, men tenkjer du på å halda deg på fjellryggen, finn du den fort at.
Eit anna tips er å ta ein rast ved eitt av dei mange vatna som ligg der. Idyllisk ein solskinnsdag.
Er du lur har du pakka med deg badetøy for ein forfriskande dukkert.
Det siste strekket ned frå Midtsæterfjellet er igjen litt bratt. Du skal ned om lag 340 høgdemeter i løpet av vel to kilometer. Stien er god å gå på, så sjølv om beina kanskje byrjar å bli møyre, bør det gå fint.
God tur!