– Sei aaaa!
Ungane ved Søre Neset FUS barnehage har blitt ekspertar på tannhelse.
Som del av fagområdet kropp, rørsle og helse har Søre Neset FUS barnehage hatt eit prosjekt om mat og helse, med særleg fokus på tannhelse.
– Vi vaksne valte tannhelse, det er viktig å starta tidleg i livet med å ta vare på tenna våre, seier pedagogisk leiar ved avdeling Vargavågen, May-Christin Fjærestad.
Barnehagen og ungane starta med mat, å skilja sunn mat frå usunn mat. "Det blir ikke hull i en tann som er ren” blei månadens song.
Leik, film og fargelegging
– Ungane var opptatt av Karius og Baktus, som glei inn som naturleg del av pensum. Vi las boka, høyrte lydbok, såg filmen og fargela teikningar av Karius og Baktus.
Borna har også leika, lagd eigne tenner, tatt bilde av kvarandre sine tenner og snakka om melketenner og vaksne tenner.
Avslutta med besøk
Prosjektet blei avslutta med besøk av tannpleiar Bente Bakke og tannpleiar-student Eline Wathle.
Dei prata om tannhelse og kosthald, og viste forskjellige tenner. Dei hadde også med seg ein kjempestor tannbørste og utstyr som ungane kunne få prøva.
Gåver fekk dei også, kvar sin tannkost og kvar si drikkeflaske til borna ved avdelingen.
- Som takk fekk tannpleiarane kvar sine teikningar som to av ungane våre hadde laga, fortel May-Christin.