Sander senka serieleiaren

Os 2 kjempar om å halda seg i 4. divisjon og spelte onsdag kveld sesongens nest siste kamp.

Kampen gjekk borte mot Frøya, som allereie har sikra seg status som avdelingsvinnar og plass i 3. divisjon neste år.

– Vi hamna under 1-0, men utlikna minuttet etter. Aggressivt og godt spel gjorde at vi kunne ta ein solid siger, seier trenar Tore Nielsen nøgd.

Os 2 har no slått alle dei tre øvste laga på tabellen.

Frøya – Os 2 1-5 (1-1)
Målskårarar, Os 2: Sander Kvittingen 2, Preben Borgen 2 og Roar Vestbø.

Os 2, 4-4-2: Anders Kloven - Kjartan Svendsen (Øystein Takle Eide), Mads Lepsøe, Adrian Valle, Torkel Hjertnes - Hadi Amiri, Stian Lunde, Preben Borgen, Emil Halver (Aksel Skår) - Sander Kvittingen, Roar Vestbø.

• Sander Kvittingen utlikna, Preben Borgen skåra på frispark før Roar Vestbø kort tid etter auka til 1-3.

• Preben kom åleine då han banka ballen inn over keeper til 1-4 før Sander også skåra sitt andre for dagen.

Dei med lengst fartstid frå høgare nivå, Anders Kloven, Stian Lunde, Preben Borgen og Torkel Hjertnes frå A-stallen, får ros etter kampen.

– Det var kjekt å sjå den entusiasmen desse etablerte spelarane viser på kamp med andrelaget, og det samhaldet som er i gruppa. Det er heilt unikt i Os.

– Og så er det veldig kjekt å sjå ungdomen blomstra når dei får med seg litt meir erfarne spelarar. Vent og sjå; spelarar som sander Kvittingen og Adrian Valle blir viktige ressursar for Os i åra som kjem, seier Nielsen.

Det er ikkje lenge sidan han sa det same om Fredrik Heggland, Simen Lassen og Erik Kanestrøm, som no speler for Brann og Nest-Sotra.

Framleis håp om å halda seg?

Os 2 ligg, når éin kamp står igjen, på 11. og nest siste plass på tabellen.

Dei er a-poeng med Loddefjord, om dei slår Loddefjord i siste runde (på heimebane laurdag klokka 12.30). Då er dei også a-poeng med Valestrand Hjellvik, om Valestrand Hjellvik taper siste runde, som går borte mot Odda på 2. plass.

Loddefjord og Valestrand Hjellvik har langt betre målforskjell enn Os.

MEN: Os 2 er på trygg avstand frå 12. plass og kan, med 8-målssiger i neste kamp, klatra til 9. plass.

Det er 12. plass og svakaste 11. plass frå dei to avdelingane i Hordaland som rykker ned.

Askøy på 11. plass i naboavdelinga har 16 poeng mot Os 2 sine 21.

Men i tillegg skal det rykka ned like mange lag som det kjem Hordalands-lag ned frå 3. divisjon.

Dermed held det ikkje med 11. plass for Os 2, dei treng truleg ein solid siger på heimebane laurdag.