Saman om store jobbar

Dei har kvar sine røyrleggjarfirma frå før, men har som privatpersonar gått inn med kvar sin like store del i det nye selskapet. Øystein Engevik, Kjetil Engelsen, Stig E. Nilsen og Sverre Samdal skal halda fram med kva sine firma som før, men blir med nytt firma store nok til å rekna på oppdrag i klassen 3 millionar pluss.

- I selskapa vi har frå før har vi omtrent like mange tilsette, rundt 20 til saman. Selskapa sine tilsette blir brukt av det nye selskapet når dette får oppdrag seier styreleiar i det nye selskapet, Stig Nilsen.

Lokal service
Å rekna på store oppdrag har til no vore med blanda kjensler for dei som har prøvd.

- Det har hendt at eg har rekna på større oppdrag, og då har eg gjerne vore litt nervøs for kapasiteten. Det ville gått fint å ta oppdraget, men det er alltid ein del serviceoppdrag hos faste kundar lokalt i tillegg, seier Engelsen.

- Vi er alle godt etablert i Os, og då er det fleire som reknar med rask respons om det er noko dei treng. Med Os VVS blir vi meir fleksible for både små og store kundar, legg Engevik til.

Konkurrentar og partnar
Det var eit muntert møte med dei fire røyrleggjarane, og på spørsmål om dei er gode nok venar til å samarbeida, når dei elles er konkurrentar, svarar Engelsen:

- Dei seier at den beste måten å bli uvenar på er å prøva å samarbeida.

- Men så gode vener er vi no ikkje, så dette går nok bra, legg Nilsen til.

Den første testen av kva konkurrentane unnar kvarandre, fekk vi då Midtsiden spurde kven sin bil vi skulle ha i bakgrunnen på bildet utanfor Samdal sitt kontor i Jordmorsvingen. Ingen foreslo den andre sin bil eller bygning, så dei blei raskt einige om å ta bildet med ”nøytral bakgrunn”.