Saknar niesa si

Dei tragiske hendingane i Oslo og på Utøya veks i omfang. 7 personar omkom i bombe-eksplosjonen i regjeringskvartalet fredag ettermiddag, minst 84 blei drept på Utøya same kveld.

– Eg er på veg til Utøya for å leita etter niesa mi, seier Ingrid Netland.

Lokalpolitikaren frå Os var i barndomsbygda i Vesterålen i går, og har kjørt sørover saman med broren, far til den 17 år gamle jenta som er blant dei sakna.

– Sjansane er nok små for at vi finn ho i live. Det er heilt tragisk. Bror min mista si første dotter for mange år sidan, ho blei berre ni månadar gamal. Og no dette, seier Netland.

Ho reknar med å vera i Oslo i kveld. På vegen har ho og broren ringt til det som er av sjukehus og redningspersonell for å høyra om nokon har sett jenta dei saknar.

– Truleg ingen frå Os

Ordførar Terje Søviknes seier han sat til langt på natt for å følgja med på utviklinga i saka, som starta med ein stor eksplosjon i Oslo sentrum i 15.30-tida fredag.

– Det er heilt uverkeleg. Tankane mine går til dei stakkars ungdomane som har opplevd dette skrekkscenariet på øya, og til dei mange pårørande, seier ordføraren.

Samstundes som han følgte med på siste nytt i saka prøvde han å få informasjon om det var osingar på Utøya.

– Det er ikkje kome offentleg stadfesta informasjon om dei sakna, men så langt har vi heller ikkje noko som tyder på at det har vore folk frå Os på Utøya under skytinga.

26 frå Hordaland

Os Ap sin ordførarkandidat ved valet til hausten, tidlegare rådmann i Os, Lars Atle Skorpen, følgjer hendinga frå feriebustad i Spania.

– Det er så stort og tragisk at det er nesten umogleg å ta inn over seg. I tal er denne massakren større enn det meste av liknande tragedier som har skjedd ute i verda, samanlikna med folketalet vårt i Noreg er hinsides alt anna, seier han.

Skorpen var blant dei Søviknes ringte til i går, både for å få informasjon og for å forsikra Skorpen om at Os kommune vil stilla opp om nokre treng hjelp.

– Det var fint av han. Eg sat som Søviknes utover kvelden og prøvde å få mest mogleg informasjon. Eg har forstått det sånn at det ikkje var folk frå Os på øya, men at rundt 5 av 25 frå Hordaland framleis er sakna.

Ifølgje BT.no var det 26 frå Hordaland på Utøya. Fem av desse skal vera sakna, blant anna ungdomar frå Askøy og Osterøy.

Stengt nattklubb i Os

Bar2Be stengte fredag kveld grunna hendinga i Oslo.

På Irish Cat var det ope, men ein noko rolegare kveld enn normalt.

– Det var nokre færre ute i går. Også i kveld har vi ope, eg tenkjer at folk reagerer ulikt på det som har skjedd og tilbodet kan vera der, seier dagleg leiar på Irish Cat, Patrick de Castro.

Også Bar2Be har ope laurdag kveld.

Markering over helga?

Ferieavvikling og ein spesiell situasjon som kom brått på gjorde, ifølgje ordføraren, at det ikkje var kommunal flaggheising om morgonen laurdag.

– Men det gjekk ikkje lang tid før vi fekk telefonar, og då var allereie administrasjonen i dialog med flaggheisarane våre, så det blei flagga på halv stang på fleire av stengene til kommunen.

I minneparken er det ikkje heist flagg, men både i Os sentrum, utanfor rådhuset og utanfor Oseana er det flagging i dag.

– Eg reknar med at det vil koma ei landsomfattande markering om ikkje så lenge, truleg ein av dagane over helga, seier ordførar Terje Søviknes.