Såg mystisk lys frå Bogstrand

Laurdag for ei lita veke sidan var Fredrik Morvik og gjekk tur med hunden sin i fjella bak Bogstrand.

Han tok nokre bilde av utsikta i gråvêret, og då han såg gjennom bilda seinare oppdaga han eit lys som han har problem med å forstå kvar kom frå.

– Det er verken sol eller måne, sola er som du ser av lyskjelda eit godt stykke til høgre på bildet, månen er seks timar bak. Dette lyset er cirka tre timar bak sola, fortel Fredrik.

På dei ulike bilda han har sendt ser vi at lyset heller ikkje er på same plass i bilderamma, så det er neppe ein feil i objektivet i kamera.

Bilda er tatt i 17-tida på ettermiddagen.

– Neppe ei bisol

Midtsiden kontakta Meteorologisk institutt, for å fortelja om bilda.

– Det kan høyrast ut som ei bisol, seier meteorologi-konsulent Stian Gundersen.

Les meir og sjå bilde av bisol på met.no.

Men då han fekk bilda oversendt på epost skifta han meining.

– Dette er neppe ei bisol. Det ser rett og slett ut som ei sol, men om sola er til høgre for lyset er det vanskeleg å seia kva det er.

Midtsiden har sendt bilda over til den kjente astronomen Knut Jørgen Røed Ødegaard, og kjem tilbake om vi får svar.