Rytmiske stunt på Skeie
Bildeserie: Nore Neset Dagane er i gang.
Bildeserie:
Laurdag og søndag er det tett med aktivitetar og underhaldning i og utanfor Nore Neset Aktivitetshus.
I hallen er det rigga ein stor kafé, omringa av fotoklubb, idrettslag, korps og andre lag som stiller ut kva dei har å tilby.
– Då eg meldte meg inn i Os Fotoklubb var denne typen utstilling det eg håpa på å få til, seier Anne Røberg, arrangør og hobbyfotograf.
Blant dei lokale utstillarane er Tore Solvang, Bjarte Løvaas Haugland, Trond Aarvoll og Simen Soltvedt.
– Friluftsinteressa kom først, via speidaren, men dei siste åra har eg avansert frå eingongskamera via kompaktkamera til speilrefleks. Kameraet er alltid med, seier Solvang.
Ivrige rockarar
Ved kafeen er det òg ein scene, der vi i dag fekk sjå cheerleading, dans, song og luftgitar.
Med halsbrekkande stunt opna cheerleaderane showet. Tag The Floors følgte opp med kul dans og akrobatikk.
Os Rockeklubb styrer lyden og inviterte til osmeisterskap i luftinstrument.Det var ikkje meir enn fire-fem ungar som våga seg på scenen, trass i svært innlevelsrik demonstrasjon av dei vaksne i rockeklubben, Kjetil Osablod Grønvigh, Even Hjertaas og Hans Marius Johnsen.
Cup og radiostyrte bilar
Utandørs er det hoppeslott, fotballcup for jenter på veg inn i 9-arfotball og test av radiostyrt bil på BOMBK sin bane.
– Vi har allereie fått fleire medlemmar og det har vore ein del innom og testa, seier Jostein Helland.
Nore Neset Dagane held fram i morgon, blant anna med trimløp til Liafjellet.