Russen spreidde glede i Os
Køyrde «Optimist-rulling» på Luranetunet, Kuhnle, sentrum og AMFI.
Bildeserie:
- Midtsiden har starta utsending av gratis nyheitsbrev på epost - meld deg på her
Årets russefeiring er kraftig redusert.
Les òg:
Men feiringa er i gang og skulane i Bjørnafjorden kommune har til saman rundt 15 russebilar.
I dag var ungdom fordelt på fire russebilar og to sivile bilar på rulletur for å spreia glede i heimbygda. Initiativet kom frå to osingar som er avgangselevar ved Nordahl Grieg. Eller rettare sagt; frå faren til ein av elevane.
– Eg har ikkje vore russ sjølv, det nærmaste eg kom var å vera sjåfør for kona då ho var russ, seier Jan Kristian Rokne og ler.
– No har vi vår andre russ i huset, og då ho hadde russevenar på besøk, og dei skal ha dåp i kveld, så kjente eg at «no må det skje noko».
Jentene var med på ideen, varsla resten av russen i Os og Fusa og fekk god oppslutnad. Samtidig rigga Pappa-Rokne ein tilhengar med lyd og sjekka interessa ved institusjonane for å få besøk.
Dagens rulling starta på Luranetunet, til Jahn Teigen sin «Optimist» og vidare til «La det swinge» og «Fugledansen». Turen gjekk vidare via Os sentrum til Kuhnletunet før den heldt fram til Amfisenteret og nokre tilfeldig utvalte nabolag.
– Eg synest det er veldig fint gjort å besøka oss! Vi har tatt med oss ut dei det passa for, og vi synest alle dette er veldig gøy, seier Irene Særvold Halvorsen.
Saman med kollegaen Amalie Evensen kasta ho seg delvis med i dansen. På Kuhnle fekk russen etterkvat styra musikken sjølv, og då kjente Amalie, som var russ i fjor, det skikkeleg i rockefoten.
– Vi hadde ei veldig fin russetid i fjor, og no kjenner eg at eg saknar det. Eg håper årets kull får mest mogleg ut av denne feiringa.
«Avlys det!»
Blant dagens kortesje var to av dei fire russebilane frå Fusa vgs. Russepresident Emilie Furevik er medlem på ein av dei to tvillingbilane.
– Vi er ein venninnegjeng på 15, så det blei to bilar med same namn. Namnet «Cancel IT» tok vi før korona kom, fordi vi fekk mykje motgang med både oppussing av bilane og å få løyve til å skjenka på russeslepp, forklarer ho.
Men russetida blei ikkje heilt avlyst.
– Vi hadde dåp via video. Då var kvar russebil samla i kvar si stove, og eg trur alle hadde ein fin fest.
– Seinare har vi brukt ein parkeringsplass som ligg for seg sjølv. Der forstyrrer vi ingen, samtidig som vi kan vera samla, men på trygg avstand gjeng for gjeng.
Vil rulla på 17. mai
Det er i alt rundt 50 russ ved Fusa vgs. Elevane er frå blant anna Os, Fusa og Kvam.
På Os Gymnas og Os vgs er det til saman over 10 russebilar.
– Til no har vi festa kvar for oss, bil for bil, men vi vil undersøka om vi kan vera litt meir samla no når det er sleppt opp. Vi ønskjer òg å rulla 17. mai, kanskje vi koordinerer litt med Os Amcar, og kjem tilbake til Midtsiden når vi veit kvar og kor tid, seier president ved Os Gymnas, Martine Særvoll Pedersen.
Sjå bildeserie frå dagens rulling under (bildeseriar på Midtsiden er berre synlege for pålogga abonnentar). Her kan du kjøpa abonnement.