Rusa ungdom utfor med bil

Politiet rykte ut til Halhjemsvegen etter melding om utforkjøring i 3-tida natt til søndag.

– Då var bilen vekke, men blei funnen igjen eit stykke bortanfor, då utan førar eller andre i bilen, fortel politioverbetjent Terje Sperrevik.

Bilen hadde vore borti autovernet og politiet klarte å spora opp dei som skal ha vore i bilen.

– Ikkje alt er avklart enno, men ut frå notatane ser det ut som om bilførar er ein tenåring utan førarkort, mistenkt for å ha kjørt i rusa tilstand, seier Sperrevik.

Tømte møkkatanken i ugunstig retning

Fredag fekk politiet melding om møkkaspreiing på Tøsdal nær E39, der noko møkk kom ut i vegen og trefte passerande bilar.

– "Hele siden var full av møkk" står det her.

Bonden har forklart at han hadde kjørt seg fast og måtte tøma tanken for å koma seg opp igjen. Samstundes hadde det vore ugunstig vindretning.

– Det var litt dårleg stemning på staden etterpå, men det løyste seg utan noko konflikt.

Henta kvinne og barn etter bråk

Natt til måndag var politiet på ei adresse i Hagavik eter melding om husbråk.

Politiet tok med seg mot og barn for overnatting på ei anna adresse etter bråket.

Ringte nødnummer i eitt sett

Ein mann som ringte nødnummeret utan at det var naudsynt fekk til slutt besøk av politiet, som bad han stoppa.

Eller - det var ikkje til slutt. For i det politiet kjørte frå staden heldt han fram, så dermed blei han henta og kjørt i arresten.

Promille på sjø og land

Politiet har hatt trafikkontroll på Hatvikvegen søndag i 15-tida, der dei tok ein i 64 km/t i 50-sona, og på Halhjemsvegen i 23-tida laurdag kveld, der dei kontrollerte 13 bilførarar utan å finna noko å reagera på.

Søndag i 16-tida tok dei ein bilførar mistenkt for promillekjøring på Byvegen, laurdag fekk dei melding om ein båt som hadde vore borti ein annan båt ved Ervikane.

Meldar sa båtførar truleg hadde promille. Politiet snakka med vedkomande, som innrømte å ha vore borti, men hadde ikkje kapasitet til å rykka ut og ta blodprøve.

Politiet fekk også melding om kjøring med vassjet i Hagavik. Politibåten, som har vore på tokt og på øving i Os i helga, fann ikkje vassjetkjøraren.

Hærverk eller innbrotsforsøk

I bygningen i Stegen der det tidlegare var barnehage har det vore skadeverk.

– Vi veit førebels ikkje om det har vore innbrotsforsøk eller om det er snakk om hærverk, seier Sperrevik.

Funn av sykkel, moped og båt

I løpet av helga er det funnen ein sykkel av type DBS ved Os Taxi, funn av ein ribba moped og funn av båt.

Båten er ein eldre oransje Askeladden utan påhengsmotor, som blei funnen i Ulvsund (sjå bilde).

OPPDATERT: Eigar har meldt seg og fortalt at båten var fortøydd der midlertidig og skal hentast i dag.

Tigging, knuffing og høg musikk

Frå fleire plassar i Os har politiet i helga fått melding om tigging, der utlendingar går på dørene med ein lapp der det står at dei treng pengar til ungane sine, som visstnok er sjuke.

Det har også kome melding om støy, blant anna frå fest på Søre Neset og i 5-tida søndag morgon, frå ein båt som låg ved Essoen.

I løpet av natt til søndag kom det også melding om knuffing i Os sentrum, utan at det blei politisak av det.

Frå Søfteland kom det melding om ein hund som sto og ulte. Eigar blei kontakta og han lovde å koma heim og ta seg av hunden.