Rune Vindenes til heimbygda med nytt leseverktøy

Fredag var Rune Vindenes på besøk på to skular i Os med pizza som premie etter gode resultat i lokal lesekonkurranse på plattforma «Lesemeister».

Kuventræ, Øyane, Hegglandsdalen og Strøno barneskule deltok. Strøno fekk premie for å ha lese mest, mens Hegglandsdalen vann loddtrekning blant dei som hadde lese ei bestemt mengde sider.

Vi var med til vinnarane i Strøno - sjå videoen i ruta over.

– Hegglandsdalen barneskule har brukt Lesemeister i eit halvt år, dei andre tre er nye, fortel Rune Vindenes.

Vindenes, som sjølv er frå Os, er utdanna lærar og dataingeniør. Han jobba i It's Learning for ti år sidan. Etter ni år i eit firma som jobbar med tekniske løysingar for mobilkommunikasjon, byrja han i fjor å jobba for ein tidlegare studiekamerat sitt selskap, ePekebok AS.

– Sondre Bjørnebekk starta selskapet i 2012, og har hatt tett samarbeid med dei store forlaga sidan den gong. I 2017 hadde han ein ny idé, og kontakta meg, seier Rune, som no er dagleg leiar i selskapet.

Enklare og gøyare å lesa

«Lesemeister» gir ikkje berre tilgang på fleire hundre elektroniske kvalitetsbøker for born, på bokmål og nynorsk, Lesemeister er ei plattform bygd for å auka motivasjonen til å lesa.

– Elevane får poeng etterkvart som dei les, dei kan ta opp og høyra si eiga lesing og dei kan få teksten opplest, som ei lydbok. For dei yngste elevane kan dette med lesing med lyd, at dei følgjer teksten mens andre les, vera ei god støtte i lesetreninga.

– Her er det dessutan automatisk leselogg, foreldra treng ikkje kvittera for kor mange sider eleven har lese heime. Læraren kan òg enkelt følgja med på framdrifta til kvar elev, og til klassen samla.

Blei testa av 100 skular

Då selskapet etterlyste tre skular som hausten 2017 ville testa det nye verktøyet gratis, var det 100 som meldte seg. Alle 100 fekk testa. Til no er 60 skular kunde.

– Det er litt ulikt frå skule til skule kva dei har tilgang på av datamaskiner, nettbrett og chromebook. Nokre skular er å vent, men seier dei vil ta dette i bruk når nytt datautstyr er på plass.

– Kan også privatpersonar kjøpa dette til eigne born?

– Førebels ikkje, men det er ikkje umogleg at vi legg til rette for det i framtida. Men elevar på skular som er kunde hos oss kan logga seg inn via kva som helst, anten det er PC, nettbrett eller foreldra sin telefon, og få full tilgang, seier Rune Vindenes.