Rømmer innandørs
Sidan det kan sjå ut som om våren er utsett flyttar Os sentrum Vårslepp-scena innandørs. – Med dei vérutsiktene som er for laurdag såg vi ikkje anna råd, seier Geir Amundsen.
Laurdag arrangerar Os sentrum vårslepp med gode tilbod, utstillingar og tilhøyrande mote- og bunadsshow.
– Då eg vakna til snø i dag tidleg, blei eg skikkeleg uroa for korleis morgondagen skulle bli.
– Heldigvis tok Per Tore Bakketeig det på strak arm og tilbydde seg at vi kunne flytta scenen innandørs i lokala hans i Landboden, fortel leiar i Sentrumsforeninga Geir Amundsen medan han flyttar på kasser og utstyr for å gjera plass til scene og publikum.
– Blir tøft
Lokalet på omlag 360 kvaderatmeter skal i løpet av timer ryddast og gjerast i stand for å husa mote- og bunadsshowet, saman med dei to konsertane med Havfest og Fonos.
– Eg trur det kjem til å bli kjempetøft.
– Vi riggar til scene her, heng opp noko stoff der, så blir det publikumsområde her, seier Amundsen og peikar rundt seg i lokalet.
Elias på Torget
Sjølv om det er spådd regn også på laurdag håpar Amundsen det ikkje blir så mykje at båten Elias byrjer flyta på Torget.
– Av tryggleiksomsyn blir Elias landfast også i år.
– Vi tek ikkje sjans på å setta han på fjorden med bølgjer og stri straum i Oselva, i staden kan alle born som vil prøvesitja han gjera det framfor bokhandelen, avsluttar Amundsen som håpar på godt besøk tross regnvarsla.