Riggstart og programslepp til familiedagen
Legging av festivalgolv er i gang. Samtidig fortel festivalleiinga om to gratisdagar for store og små.
Det nærmar seg start for årets Øyafest. Tredje utgåve ser ut til å bli nok ein rekord.
– Tikkar billettane framleis ut frå TicketCo?
– Ja, meir og meir per dag. Natt til fredag passerte me totalen på fjoråret, seier Ivar Bøthun.
– Men de skal gjerne selja litt ekstra for å dekka inn Lukas Graham?
– Det hadde gått fint å gå i minus òg, me har overskot frå tidlegare år til å dekka inn det som truleg blir ein ekstra flott konsert. Men ja, men skal selja litt meir enn i fjor. Det ser ut som om me når den neste milepælen ganske snart.
Men ikkje alt på Øyafest krev billett.
Parallelt med rigging har festivalleiinga no spikra ferdig programmet til familiedagen fredag.
– Det blir gratisaktivitetar for ungar og ungdom på dagtid både torsdag og fredag, seier Tommy Aasen.
Øyafest opnar nemlig med det Poker Run-inspirerte Rebus Run i båt torsdag. Basen blir på Bunnpris Vedholmen.
Familiefesten på dagtid er framskynda frå laurdag, som det var i fjor, til fredag.
– Me har fått stadfesta at Bjørnis kjem. Det gjer òg tryllekunstnar Steinar Thelen, som var her i fjor, og så har me leigd inn nokre klovnar.
Det skal òg vera nokre konkurransar med ganske fine premiar.
– Det blir lasermåling av fotballskyting, der me gjennom dagen gir i oppgåve å skyta med ei viss kraft. Dei som for eksempel kjem nærmast 35 km/t, går vidare. Til slutt blir det finale, der ein eller annan vinn ein Playstation 5, fortel Bøthun.
Premien er finansiert av overskotet ungdomslaget fekk frå standupshowet med det lokale talentet Marius Vedholm Aasen.
– Ungdom og fedre som vil fyra laus, kjempar òg om premie. Det blir premiering av hardaste skot.
Eit anna lokalt talent, Christer Sundøy Røttingen, deltar i rigginga. Christer har skrive song til Øyane og song til Øyafest, og skal sjølv opptre på årets festival.
– Han er ein av få artistar som har i raiden sin (lista artistar har over mat, drikke og ting vedkomande vil få servert backstage) at han må få lov å hjelpa til å rigga, seier Ivar med eit smil.
Nytt i år er utvida serveringstilbod.
– Der bomma me litt i fjor, med litt smal meny. Lilleballong var her med sukkerspinn og popcorn, dei kjem i år òg.
– Men i tillegg vil både me sjølv og butikken ha kiosk med sal av brus, hotdog, vaflar, kaker og kaffi.
Sundøy Arena byrja i går å ta form.
Tidlegare år har Øyafest-arrangørane sin frivillige mannskap overraska leverandørane med høgt tempo på golvlegging og teltrigging.
I år stiller dei med sitt eige golv, og litt meir langsamt tempo.
– Me kjøpte dekket brukt, og det kom rett frå noko som truleg var ein våt kveld på Koengen, så det må spylast reint før me kan legga det på kunstgraset.
Arbeidslaget laurdag delte seg i spyling, transport og legging, og gradvis kom brikkene på plass.
Bildeserie:
Neste steg blir rigging av scene og telt.
– Eg trur første lass kjem allereie måndag, seier Tommy Aasen.
– Me har vore nøgd med lyden før, men i år blir det endå betre. Me har leig inn endå betre PA-anlegg, legg Ivar til.
Nytt i år er òg shuttlebuss. Festivalen har tidlegare hatt gratis buss frå Øyane og innover land etter festivalslutt.
– I år vil me både henta gjestane og få dei heim igjen, så bussane går i eitt mellom Os og Øyane frå ettermiddagen av.
Øyafest - dag for dag
Torsdag 1/8 - Bunnpris Vedholmen
12.00 Rebus Run
Rebusløp i båt for ungar og ungdom.
Torsdag 1/8 - Humrahølo
Tommy Fredvang
(fri entré, inga aldersgrense)
Fredag 2/8 dagtid - Sundøy Arena
12.00 aktivitetar, konkurransar, ballong-gjøgling, klovnar og live performance/kunst av Carlos Delgado
12.30 Bjørnis
13.00 Trylleshow
(fri entré, inga aldersgrense)
Fredag 2/8 - Sundøy Arena (telt)
Vinskvetten
Up River Boys
(utselt)
Laurdag 3/8 - Sundøy Arena (telt)
Pakkers
Christer Sundøy Røttingen
Goggen
Laurdag 3/8 - Sundøy Arena (hovudscenen)
Marion Ravn
Lukas Graham
Ringnes-Ronny
