Rekordmange bustadar til sals

I går skreiv vi om einebustaden på Berge som sette ny prisrekord i Os då den blei seld for 8,1 millionar kroner.

Det er ikkje den einaste bustaden til sals i Os om dagen. I skrivande stund er det 198 treff og 100 annonsar om du gjer eit søk på Finn.no

– Det er nok noko nær rekord i talet på husvære til sals på same tid. Det har vel vore oppe i 102, men eg er likevel ikkje uroa.

– Til samanlikning meiner eg det var eit par og åtti under finanskrisa. Då vi starta låg det rundt 50-60 annonsar ute samstundes, seier Herman Brandt i Privatmelgeren Vikør & Brandt.

Mykje nytt som er ferdig

Situasjonen blir stadfesta av Åge Gulbrandsøy hos BO Eiendomsmegling.

– Det er veldig mykje for sal i Os om dagen, men marknaden er bra, så no har huskjøparar litt å velja i.

– Eg trur det heng litt saman med at det er fleire prosjekt som ferdigstilles om dagen. Til dømes leilegheitene i Solstrandvegen, kor det er innflytting no i juni.

– Det er gjerne slik at dei som kjøper leilegheit sit i ein einebustad som dei legg ut til sal. Dei som kjøper einebustaden har gjerne ein tomannsbustad som dei då må selja. Slik sett får ein ringverknader av at nye prosjekt blir ferdig, forklarar Gulbrandsøy.

70 fleire til Os i 1. kvartal

Dette er nok ikkje forklaringa åleine. Ser ein på tala frå SSB ser ein at nettoinnflytting til kommunen var 70 i 1. kvartal 2016. Rett nok noko lågare enn dei tre foregåande åra, då det kom 128 (2013), 91 (2014) og 94 (2015) i same periode. Totalt har det vore ei netto tilflytting på 1.223 i løpet av dei tre siste åra.

– Eg trur mange opplever Os som ein kommune kor det er lettare å få ting til. I Bergen opplever ein nok mykje større grad av byråkrati enn det ein gjer i Os. Eg trur husbyggarar og utbyggarar opplever et enklare å forhalde seg til Os, seier Brandt.

Gode prisar

Sjølv med rekordmange bustader til sal opplever ikkje meklarane at marknaden har blitt dårlegare.

– Nei, utviklingsmessig har det vore ei lita prisauke det siste året. Nokre områder er betre enn andre. Spesielt Søfteland er veldig populært om dagen. Der blir bustadene fort omsatt, til gode priser, fortel Gulbrandsøy.

Brandt er einig.

– På Søfteland selde vi nettopp ein einebustad til svært god pris, så det er eit område som er godt.

Optimismen rår

Dei to meklarane ser ingen grunn til at marknaden skal stupa.

– Akkurat no er leilegheiter litt rolegare, men både einebustadar og tomannsbustadar går bra. Det er ingen grunn til at det skal endra seg, trur Gulbrandsøy.

– Dette skal nok gå veldig bra. Vi ser det er stor interesse blant kjøparane både i talet på nedlasta salsoppgåver og på visningene, men med mange bustader i marknaden kan kjøparane ta seg litt meire tid og vera litt meir kresne. Eg trur folk tenkjer seg litt meir om og går litt fleire runder før dei legg inn bud, enn det dei gjorde tidlegare, seier Brandt.

– Kva må ein gjera for å få vera attraktiv, då?

– Det vi ser er at dei gode eigedommane får god pris. Dei som ligg litt «off» og er i dårleg stand er det vanskelegare å selje. Eg seier ikkje at ein skal totalrenovera før ein skal selja, men ein bør gjera ferdig påbegynte prosjekt og kanskje ta ting som er heilt utdatert. Om taket er modent for utskifting vil eg nok tilrå kunden å bytta det før ein legg eigedommen ut for sal, avsluttar Herman Brandt.