Rekord-torsdag på Tysnes

Bildeserie:

Full skjerm

1 av 6

Årets Tysnesfest er i gang, og torsdag kveld var første konsertkveld på hovudarenaen, Gjerstad.

Novocaine, Rotlaus, Lind+Nilsen+Fuentes+Holm, Löv, Åge Aleksandersen & Sambandet og DDE sto på plakaten.

– Vi har ikkje det eksakte publikumstalet, men vi hadde nærmare 5000 inne på området, fortel dagleg leiar i Stiftinga Tysnesfest, Øystein Vaage til Midtsiden.

– Folk kom tidleg og det var god fart i publikum allereie i 19-tida, med Rotlaus på scenen. Vi hadde ein del unge på området, sjølv om fleire av kveldens band truleg trefte dei eldre betre, men vi ser av ølsalet at snittalderen var noko høgare i går enn til vanleg.

Åge med utvida band og blåserekke leverte ein knallkonsert og DDE fekk det til å ta heilt fyr.

Den førre rekorden er på 4.700 frå torsdagen i 2017.

Då sto blant andre Lothepus, Astrid S og Staysman & Lazz på scenen.

Rundt 1.700 stilte til konsert med Skambankt på Tysnessåta.

– Det synest vi er veldig bra! Vi var òg heldige med vêret. I fjor var vi 1,5 minutt frå å avlysa, onsdag og fredag formiddag var det så mykje skyer at vi neppe kunne køyrd bandet opp med helikopter. Det er eit risikoprosjekt, men det har heldigvis gått bra til no.

Laurdag kan bli endå betre

I 2017 opplevde Tysnesfest publikumsrekord med 32.233 gjestar. Også i fjor var torsdagen god, men samla sett kom det 5.500 færre gjestar og festivalen gjekk med fire millionar kroner i minus.

– Vi veit ikkje om det kjem fleire i år enn i fjor før laurdag kveld. Mange kjøper billett same dag eller i døra.

– Men vi har selt nesten like mange billettar til laurdag som vi hadde inne i går, og då har vi to dagar igjen å selja billettar på.

Dessutan er hamna full, og onlinebestilling på festivalcampen er stengt.

I kveld skal blant anna Aurora syna på Gjerstad, med låtar frå nytt, kritikarrost album.

Fredagens artistar på Gjerstad: fucales, Staut, 10cc (UK), Skambankt, AURORA, DJ Axillar og Matoma.

Laurdag kjem desse; Det Sjukaste Vorspielet med Staysman & Lazz, Mads Hansen og Oral Bee & Mr. Pimp Lotion, Shuffle Baby,Kriminell Kunst, Ina Wroldsen, Julie Bergan, Kjartan Lauritzen og Broiler.

• Video: Arne og Andreas varmar opp til Døds Challange på Tysnes