Reiser til Oslo for å pakka

I går fekk Terje Søviknes jobb i regjeringa, i dag reiser partikollega Laila Reiertsen til Oslo for å rydda ut av kontoret sitt på Stortinget.

– Eg synest Terje var veldig flink i går og eg fekk sjølv mange fine meldingar frå folk som er glade for at han er ny olje- og energiminister. Meldingane kom både frå partifeller, politikarar frå andre parti og frå folk i oljebransjen, fortel Laila Reiertsen til Midtsiden.

– Mange ser på Terje som ein dyktig politikar. Det at han kjem frå Vestlandet og er engasjert i næringslivspolitikk trur eg med på å gjera at folk ventar mykje av han.

Ferdig på Stortinget

Men det var ikkje berre statsrådar som blei skifta ut i går, fleire statssekretærar har fått avskil i nåde. Blant dei er Gjermund Hagesæter, som Laila har sete som vikar for i litt over eit år.

Det betyr at Laila mista jobben i går, som fraksjonsleiar i familie- og kulturkomiteen, og no kjem heim igjen til Os.

– Eg synest det er litt trist å måtta gje seg etter berre eit år. Eg har fleire saker eg heldt på med, som eg no må sleppa tak i, men sånn er livet i politikken.

– Onsdag reiser eg til Oslo for å rydda ut av kontoret, over nyttår skal eg henta tinga mine i leilegheita.

Fleire oppgåver ventar i Os

Mens ho ha sete på tinget har Reiertsen vore fast medlem av kommunestyret og formannskapet, og vore leiar av personalutvalet.

– No kan eg yta meir i lokalpolitikken.

Då ho sommaren 2015 gjorde comeback på stortinget fekk Reiertsen permisjon frå stillinga ved Ravneberghaugen Rehabiliteringssenter.

– Eg snakka med dei tysdag ettermiddag, og det er utruleg kjekt å føla seg både sakna og velkomen tilbake.

– Det kan òg bli nye verv i lokalpolitikken, er du den nye varaordføraren vår?

– Det er ein sjanse for det, men det er ikkje avgjort. Vi skal ha val i gruppa vår og så skal dette opp i ekstraordinært kommunestyre 12. januar.

Endå eit comeback på stortinget kan det bli til hausten, då Laila står på 4. plass på lista til Hordaland Frp.