Reiser heim til Slovakia

Tidleg i desember kom tre spelarar frå Slovakia på prøvespel for Os.

Dei tre gjorde godt inntrykk og kom i månadsskiftet januar-februar tilbake til Kuventræ for å bli del av A-laget.

Men denne veka er Os på treningsleir på Kypros utan dei tre utanlandske spelarane. No er det klart at dei ikkje blir del av A-stallen.

Tøft å kombinera jobb og trening

Dei tre spelarane, Andrej Nemec, Lukas Horvath og Patrick Bujna, har fått både bustad i Os og jobb hos Fløysand Tak.

– Vi har ikkje jobba før, berre spelt fotball og studert. Det er veldig uvant og ein tøff jobb, noko som av og til har gått ut over treninga, seier Patrick Bujna.

– Men eg føler vi ikkje har fått vist oss skikkeleg fram. Vi har spelt på høgare nivå der vi kjem frå og trenarane har vore nøgd.

– Tilpassingsproblem

– Det stemmer. Dei har fått beskjed om at vi ikkje tar dei med vidare, stadfestar sportssjef i Os, Lars Bakkerud.

I tillegg til tilpassingsproblem med jobb og trening seier han at det har vore ei utfordring med språket.

– Berre éin av dei tre snakkar engelsk. Dårleg kommunikasjon har vore ei utfordring for både spelarane, laget og trenarane, seier Bakkerud.

– Vi var glade for å vera i Os og får å få jobb. Vi forstår ikkje dette heilt, men no vil vi reisa heim og spela profesjonelt igjen, seier Bujna.

Står i vegen for lokale talent

Bakkerud seier dessutan at dei tre berre er like gode, eller marginalt betre, enn unge spelarar frå eigen stall på veg opp.

– Då blir det feil om utanlandske spelarar skal stå i vegen for desse.

Dei tre blei invitert til Os før Bakkerud blei tilsett. I etterkant har Os dessutan styrka stallen med Mats Cato Moldskred, Erik Kanestrøm, Emilis Zilinskas, Kenneth Gjerde og Fredrik Heggeland – og fått stadfesta at Stian Lunde og Torkel Hjertnes likevel held fram.

– Det er mogleg vi hentar spelarar utanfrå ein annan gong, men då skal det vera tydeleg at dei er topp 4-5 i stallen, at dei verkeleg kjem inn og styrkar laget.

– Fleire i støtteapparatet rundt laget har tatt seg veldig godt av desse tre. Det er synd at det ikkje utvikla seg sånn vi hadde håpa på, men ingen i Os Turn Fotball skal ha dårleg samvit for at det denne gong enda som det gjorde.