Redningsmann støttar Redningsselskapet

– Eg er så heldig at eg sjølv har fått redda liv på sjøen, fortalte Terje Søviknes då han i dag tok imot Endre Ytreland frå Redningsselskapet.

Ordførarstafetten, som er del av kampanjen Nautiskmil.no, var i Os i dag.

Søviknes kjøpe éi nautisk mil per 1000 innbyggar i Os og gav med det 10.000 kroner til aksjonen.

Men før vi fortel meir om Redningsselskapet sin aksjon, og kven Søviknes sendte stafettpinnen vidare til i Os og nabokommunen, kan du lesa om dei dramatiske minutta i Lysefjorden tidleg på 90-talet.

Kvinne med baby hamna i sjøen

Det var ein vintermorgon tidleg på 90-talet at Terje Søvknes, som den gong var student på Norges Handelshøgskole, vakna av nokre skrik.

Søviknes har vakse opp ved sjøen med utsikt mot Lysøen, og det var familien som då var vaktmeistrar på museet som var i alvorleg fare.

– Eg såg ut vindauget at snekka til familien var ute av kurs, og at det låg nokon i vatnet. Eg sprang til sjøen så fort eg kunne. Eg hugsar at eg mista ein sko på vegen, fortel Søviknes.

Mora i vaktmeisterfamilien låg i den iskalde fjorden. I armane heldt ho ei bæremeis med eit spedbarn i. I båten, som gjekk rundt i fjorden, sat ein fireåring åleine.

– Skulle plukka ein leike opp av sjøen

Kvinna med dei to borna var på veg til land då ulykka skjedde. Fireåringen hadde som vanleg ein leikebåt i eit tau på slep etter snekka, men då han mista tauet snudde mora for å plukka denne opp av sjøen.

– Ho fekk nok for høgt tyngdepunkt grunna bæremeisa, og ramla uti. Båten sto ikkje i fri, så fireåringen kjørte vidare med snekka medan mor og veslesøster låg igjen i sjøen.

Terje fekk redda mora og babyen opp i båten. I mellomtida hadde den båtvante fireåringen tatt styringa på snekka, kjørt den inn i Søvikvågen og kjørte i ring i vågen til han fekk hjelp.

– Mange folk fekk med seg dramaet, og brannvesenet rykte ut. Men alle blei ståande på land, det er ikkje så mange som har båt liggande klar om vinteren. No har heldigvis brannvesenet eigne båtar, i tillegg har vi blant anna Redningsselskapet.

– Er avhengig av gåver

Redningsselskapet har 44 skøyter. Dei tre nærmast Os ligg på Hjellestad, Kleppestø og Stord.

– Vi har eit budsjett på 400 millionar kroner i året. Rundt ein tredel blir henta inn av spelemidlar, i tillegg får vi 70 millionar kroner av Staten.

– Men vi er avhengig av støtte av næringsliv og andre for å gå i balanse, seier Ytreland.

Kampanjen med Nautisk mil med ordførarstafett har gått sidan hausten 2013, og blitt godt mottatt. Redningsselskapet har rekna ut at det kostar cirka 500 kroner per mil å driva skøytene, og «sel» no nautiske mil til kystkommunar og næringsliv.

Søviknes sendte stafettpinnen vidare til Fusa-ordførar Hans Vindenes, og blei i tillegg oppfordra å utfordra næringslivet i Os.

– Då tenkjer eg vi kan retta oss mot maritim bransje, å utfordra båtbyggar Askeladden Boats AS og bryggebyggar Alutec AS, sa Søviknes.