Redd Barna Cup lyste opp vinterkvelden
Som «oppvarming» til cupen i mai inviterte dei til hodelykt-tur til Kobbavågen. Over hundre små og store blei med på turen.
Bildeserie:
I august blei Redd Barna Cup arrangert for sjette år på rad. I år blir cupen, som er ein liten folkefest med sandvolleyball og fotball for born og vaksne, arrangert på kristi himmelfartsdag torsdag 30. mai.
• Les meir og sjå video frå Redd Barna Cup 2018
– Nytt i år er open påmelding i barneklassen, ikkje berre frå inviterte cupar. I tillegg startar vi ein eigen ungdomsklasse for dei mellom 12 og 16 år, fortel initiativtakar Tommy Aasen.
Nytt i år er òg at Redd Barna Cup tar på seg fleire arrangement enn berre cupen.
– Redd Barna Cup har blitt meir enn ei innsamling til Redd Barna, vi er no registrert som eigen organisasjon, og vi har eit entusiastisk styre som ønskjer å laga aktivitet også andre delar av året.
Stor oppslutnad om ny tur
Søndag hadde Anne Elisabeth Røttingen og Bjørg June Garvik frå Redd Barna Cup invitert til hodelykt-tur til Kobbavågen.
– Vi var overvelda over responsen, mellom 100 og 120 ungar og vaksne gjekk i kø til Kobbavågen.
Turen gjekk frå Gjelevika klokka 17, og det var framleis lyst nokre minutt etter at folk kom fram og fekk fyrt i bålet.
– Denne gong var det eit arrangement utan ambisjon om å samla inn pengar. Det handla berre om å gjera noko kjekt saman, og å ha ei sosial stund i fjøra.
– Vi drøfta om vi skulle laga nokre leikar på plassen, men fann ut at turen i seg sjølv var kjekk nok, og at vi først ville sjå kor mange som dukka opp og korleis det fungerte med så mange på tur saman.