Reagerer på bading, klemming og volleyballspel

• Midtsiden har starta utsending av gratis nyheitsbrev på epost - meld deg på her

Tysdag var politiet på Lunde for å senda 16-17 ungdomar heim. Dei hadde samlast på skulen for å spela sandvolleyball.

På dagtid onsdag fekk dei tilsvarande melding, og rykte ut for å minna ungdomen på dei generelle smitteverntiltaka.

– No når vi har vore flinke lenge, er det synd om smittetilfella i kommunen skal auka, seier lensmann Oddbjørn Dyrdal.

Onsdag kveld kom det nok ei melding om samling på sandvolleyballbanen på Lunde, og politiet ber foreldre med ungdom i hus ta ein prat med dei.

På fotballtrening skal ungdom vera maks fem personar saman, ballen skal vera nyvaska og ingen skal ta i den med henda. Det er vanskeleg å spela sandvolleyball på tilsvarande vilkår.

Ved sidan av god hygiene er det framleis desse smittevernreglane som gjeld i kvardagen:

• Ikkje meir enn fem personar bør vera samla. Desse skal halda ein avstand på to meter til kvarandre - og til andre grupper.
• I lokaler der det er vanskeleg å halda to meters avstand bør du halda avstand på éin meter.
• Avstandsreglane gjeld ikkje for dei som bur saman.

Store ungdomsgjengar driv med bading og klemming

Politiet seier dei har fått fleire meldingar om brot på smittevernreglane, både på restaurantar, skuleplassar og på bryggene i Os hamn.

Sameiget Sjøfronten Os er takksame for utsikta dei har til det yrande livet om sommaren, men fleire reagerer sterkt på det dei har sett dei siste dagane.

– Mykje fin ungdom samlast for soling, bading og leik, men det ser dessverre ut som om dei heilt har gløymd smittevernreglane, seier styreleiar Per Eide-Olsen.

– Det er handhelsing, klemming og ballspel på bryggene - vi håper politiet vil ta nokre patruljar på begge sider av hamna nokre gongar for dagen.

Fokus på trafikk

Fint vêr og tørr asfalt har ikkje berre fått folk til bryggene for bading, fleire tohjulingar er no på vegen.

– Det er dessverre ikkje alle som er like varsama, vi har fått ein del meldingar om høg fart og hasardiøs køyring, også på fortau, fortel lensmann Dyrdal.

– Det gjeld òg trafikantar på fire hjul, og vi vil vera litt ekstra i trafikken den neste perioden.