Raske Menn til Oseana
Det ligg an til å bli ein morosam haust i kulturhuset - her er nokre drypp frå haustprogrammet som blir lansert i juni.
Laurdag 18. juni slepp Oseana haustprogrammet sitt. I ei pressemelding røper dei nokre av det som er venta å bli høgdepunkta i kulturhuset siste halvår.
-Vi kan seia at hausten 2016 på Oseana mellom anna blir ein haust i humoren sitt teikn, seier arrangementssjef Berit Steen med eit smil.
Allereie i fjor haust vart det klart at Bjarte Hjelmeland kjem til Oseana i september med si suksessframsyning «I lånte fjær», der det allereie er sett opp ei ekstraframsyning. No slepp Steen ytterlegare tre humor- høgdepunkt ut av sekken.
90 minutt på 80 minutt
- Rett før jul, 17. desember, får vi besøk av trioen Raske Menn med deira siste show, «Nitti minutter på åtti minutter».
Raske Menn består av Calle Hellevang-Larsen, Anders Hoff og Øyvind Rafto.
Showet fekk strålande kritikkar og yatzy i femmarar, noko som har vist att på billettsalet. Dei har spelt for fulle hus på Latter i Oslo sidan premieren, og no skal dei ut på turné.
- Tittelen speglar jo eit show som held høgt tempo, men som er spekka av høgdepunkt. Her blir det kort mellom latterbrøla, spår Steen.
Tid i fokus
Ein som står aleine på scena, men like fullt fjellstøtt, er stand up- komikaren Roar Brekke, som kjem til Oseana 21. oktober med sitt nyaste show «All verdens tid».
- Brekke er kjend for sin utsøkte kombinasjon av verbal humor og fysiske innslag, og har evna til å treffe spikaren på hovudet i observasjonar av både meg, deg og seg sjølv, fortel Steen, som trur at fleire kan kjenne att Brekke frå tidlegare show, som «Askeladden på helt nye eventyr» og «Kroppsøving».
- Roar Brekke vart nominert til Komiprisen for «All verdens tid», og vi har god tru på at dette vil falle i smak hos osingane.
Bergensk-brasiliansk kabaret
Også i november har du sjansen til å få trimmar lattermusklane, då bergensarbrasilianaren Eduardo «Doddo» Andersen og vossingen Sjur Hjeltnes saman «ser livet passere i revy».
-Mange kjenner nok Doddo frå Brann-bloggen i Bergens Tidende, men Doddo er også ein habil musikar og komikar. På denne framsyninga, som er kalla «Doddo – ser livet passere i revy» har han med seg Sjur Hjeltnes som sidekick, og Sjur skulle vel vere godt kjent for osingane, meiner Steen, og siktar til framsyninga «200 år på to timar» med Sjur og Linda Eide, som trakk fulle hus på Oseana i 2014.
«Doddo – ser livet passere i revy» blir beskrive som eit kinderegg, ei blanding av både kabaret, konsert og kåseri. Doddo gjev oss humoristiske, nære og varme historiar frå sitt eige liv, godt akkompagnert og kommentert av Sjur ved pianoet. Regien er ved Doddo si kone, komikaren Christine Hope.