Rask, men høg reisning
Ved hjelp av stor dugnadsinnsats har lemstova frå Tveit reist seg på Lyngheim på berre 20 dagar. Men no viser det seg at bygningen blir 90 centimeter høgare enn kva det er godkjent for.
Bildeserie:
Stiftinga det historiske tunet på Lyngheim er godt i gang med å reisa lemstova frå Tveit. På berre tre veker er veggane oppe og store delar av taket på plass.
Les òg: Grunnsteinen er på plass
– Det har vore ein fantastisk gjeng som har vore i arbeid her inne, frå eldre til litt yngre. Det er mange tunge løft, men vi har ekstra god hjelp i dugnadsleiar Jan Røttingen og fagleg eksperthjelp av byggmeister Ivar Gravdal, seier eldsjel Nils Georg Brekke.
Men då takstolane kom på la naboar merke til at huset var i høgaste laget.
I administrasjonen i Os kommune stadfestar dei, etter at dei var på kontrollmåling førre veke, at lemstova er reist 70 centimeter høgare enn det som er godkjent for. I tillegg kjem yttarlegare 20 centimeter.
Søkjer om 1 ekstra meter
Endringa er for stor for endringsmelding, ABO Plan og Arkitektur, som er ansvarleg søkjar, må inn med ny søknad med nytt nabovarsel der høgda på huset er endra.
– Det er tatt ei feilmåling. I tillegg er det ikkje tatt høgde for at golvet no er isolert og tjukkare og at det nye taket blir bygd med betre lufting og anna stein, seier arkitekt Bjørn Atle Drange frå ABO.
– Huset kan ikkje demonterast, senkast og reisast på nytt?
– Nei. Det er kjørt så langt ned som vi meiner er forsvarleg i forhold til avlaup og overvatn.
– For å vera sikre på å ikkje bomma søkjer vi no om 1 meter høgare tak, då har vi 5 centimeter å gå på.
– Beklageleg
Nils Georg Brekke seier han synes det er veldig beklageleg at det blei målt feil, og at bygget blei søkt inn 90 centimeter for lågt.
– Men det er dessverre ikkje noko å gjera med det, eit gamalt hus har den høgda det har. Ein kan ikkje akkurat saga av det nokon stad.
– Er du optimist med tanke på å få naboane til å akseptera den nye høgda, og på det å få godkjenning.
– Ja, eg håper dei forstår at det er lite vi kan gjera med dette. Tunet var regulert inn i 2003, lenge før det var snakk om å skilja ut tomtene som desse naboane no har fått bygd på, så eg håper vi kan leva saman i god harmoni.