Ragnhild avgjorde for Os
Damelaget til Os har tatt fire poeng i sesongens to første kampar. Ragnhild Hernes Leonsen skåra begge då Os vann på heimebane.
Damelaget til Os starta sesongen med 0-0 på bortebane mot Krabbetor førre veke.
– I spel og sjansar er det ein kamp vi burde vunne. Vi hadde skot i både stolpe og tverrliggar, fortel Tore Nøss, som trener Os saman med hovudtrenar Cato Moldskred.
Også i fjor blei det uavgjort (1-1) mot Krabbetor på bortebane i serieopninga.
– Dei slår mykje langt og er eit litt tungt lag å spela mot, synest Nøss.
Siger i første heimekamp
Søndag spelte Os sesongens første heimekamp. Den gjekk mot Bønes.
– Her styrte vi heie kampen og skapte mykje. Men gjestane hadde ein flink og offensiv keeper som tok det meste av gjennomspela til spissane.
Os - Bønes 2-1 (1-0)
Men Bønes-keeperen klarte ikkje å stoppa Ragnhild Hernes Leonsen, som gav Os både 1-0 og 2-0 før gjestane reduserte fire minutt før slutt.
– Vi tapte for Bønes borte i haust, så det var deilig med siger i dag, sa Ragnhild til Midtsiden etter kampen.
Påfyll frå jentelaget
Os har for første gong på mange år eit lag i J16. Os J16 speler, som i hovudsak består av førsteårsjenter (15 år) og småjenter (14 år), speler i 1. divisjon.
Dei har fått ein god start på sesongen med siger over både Arna-Bjørnar og regjerande krinsmeister Vadmyra i dei to første kampane.
– Vi har hatt glede av å bruka ein av angriparane frå jentelaget, Dorte Holen, i to treningskampar og begge dei første seriekampane.
– Dorte skåra to mål då vi slo Smørås 4-2 i siste treningskamp før seriestart og har klart seg veldig bra på seniornivået.
– I tillegg til vår eigen stall, som er på 18 damer, kan vi nok ha stor glede og nytte av Dorte og andre jentespelarar denne sesongen, seier Nøss, som håper på opprykk til 3. divisjon i 2013.
Neste heimekamp går mot Smørås søndag 5. mai.