Programmet, scenane og den lynraske rigginga
40-50 frivillige sto i kø for å hjelpa. – Eg har aldri vore med på liknande, seier Odd Joar Glesnes frå Fusa Lyd & Lys.
Tysdag blei scenen i Humrahølo bygd til torsdagens kick off, onsdag kom telt og éin av to scenar til Sundøy Arena, der sjølve Øyafest fredag går av stabelen.
3,5 timar seinare var jobben gjort.
– For det første synest eg dette har blitt ein fantastisk arena, for det andre har vi aldri vore med på liknande dugnadsgjeng, seier Odd Joar Glesnes, ein av to eigarar i Fusa Lyd & Lys AS.
Status no er:
- Det er meldt sol og svak vind frå klokka 13 i dag til klokka 21 fredag kveld
- Scenen i Humrahølo er ferdig, i skrivande stund også med tak
- Hovudscenen (10 x 7 meter) blei rigga i går
- Teltet, med 63 bord og sitjeplass til ca 700 (!) blei rigga i går
- Scenen i teltet (6 x 3 meter) blei rigga i formiddag
- Christer Røttingen, kveldens første artist, har kome i land trass melding om skodde i Nordsjøen
- Bussbillettar sel godt, og det er bestilt ekstrabuss heim frå den for lengst utselte festivalen
Programmet ser du nedst i artikkelen.
Bildeserie:
Går av seg sjølv - nesten for fort
40-50 frivillige stilte opp og sto i kø for å hjelpa i det lastebilen parkerte.
– Dei var jo så ivrige at benkane i teltet var på plass før teltet, og taket blei tatt på før alle delane var på plass, så den jobben måtte gjerast to gongar, seier styremedlem Ivar Bøthun og humrar.
Festivalleinga er takksam og imponert over den enorme dugnadsinnsatsen.
Sjølv tok Ivar to steg bak då ein av dei ivrigaste, den pensjonerte byggmeisteren Kjell Aarvik kom til Humrahølo.
– Han veit jo korleis ting skal byggast.
Aarvik, som også er sponsor med firmaet sønene no driv, farta til Os for henta stillas og tok ansvar for heile prosjektet. Alt gjekk av seg sjølv, fortel Ivar.
Kjell seier han verken er flinkast eller mest ivrig av dugnadsgjengen, han synest berre det er kjekt å møta fram.
– Eg set pris på samhaldet i krinsen, og så er det jo stas å vera med desse flinke ungdomane!
Programmet
Torsdag 4/8 (fri entré): Kickoff i Humrahølo (nær Røtingavegen 458)
20.00: Christer Sundøy Røttingen (debutant)
20.30: Berit Håpoldøy, Eirik Utne og Lars Hammersland
Fredag 5/8 (fri entré): Sundøy Arena
Familiefest
13.00: Bjørnis kjem
Fredag 5/8 (utselt): Sundøy Arena
18.00: Dørene opnar
18.00: Frode Holmefjord
19:15: Martine Frotveit Johnsen
20.00: Goggen
21.00: Vestlandsfanden
23.00: Gunslingers
ca 00.30: Fyrverkeri. Pro Pyro skyt opp frå lekter mellom Hargun og Lepsøybrua
