Problem med vatnet i Os
Det var i natt berre timar frå at heile Os var utan vatn. Vassverket leverer no vatn igjen, men førebels er ikkje alt heilt som det skal vera.
Natt til fredag kom det fleire meldingar frå osingar som brått var utan vatn.
– Eg trur det var i 4-tida dei første meldte frå, seier teknisk vakt i Os kommune, Robert Flister.
Det går vatn inn til anlegget, men ein feil i elektronikken gjer at ein av prosessane har stoppa opp og vatnet ikkje gjekk vidare.
Det skal gå alarm når slike ting skjer, men også denne hadde svikta.
Få timar frå tomme basseng
Dei første meldingane som kom inn kom frå Nore Neset, Strøno og Øyane.
Fleire plassar sentralt i Os har vassbasseng, så dei hadde framleis vatn.
Men det var berre snakk om ein time eller to, så hadde dei fleste husstandane i Os vore utan vatn.
– Brunt, men trygt
Teknisk vakt med eksternt mannskap fekk raskt vatnet til å strøyma gjennom anlegget igjen.
– Men det er gjort ein bypass, vatnet blir UV-behandla, men går no ikkje gjennom fargebehandling, fortel Marianne Kramer, leiar for teknisk drift.
– Derfor har enkelte misfarga vatn, men vatnet skal likevel vera trygt å drikka.
Kramer oppmodar folk om ikkje å bruka meir vatn enn naudsynt fram til feilen er funnen og anlegget går som normalt igjen.
Det nye anlegget til Os står på Hetleflåten og blei sett i drift i mai 2011.