Presenterte fire alternativ
Ferjefri E39: Statens vegvesen med fire alternativ for kryssing av Bjørnafjorden. Fekk beskjed om å legga det eine i ei skuff og vri om låsen.
Bildeserie:
Om lag 140 osingar hadde tatt vegen til Oseana då Statens vegvesen hadde folkemøte for å presentera kor i prosessen dei var i høve ferjefri E39 over Bjørnafjorden. Prosjektleiar Signe Eikenes fortalde at dei hadde fire trasear dei no jobbar med, og som er moglege dei tar med i planprogrammet.
– Det er fleire krysningsmoglegheiter. Forsvaret har sagt at dei vil ha det lengst mogleg ut.
1. Bru frå Vernøyna på Tysnes til Bjørnatrynet og tunell til Moberg
2. Bru frå Svarvahellaholmen på Tysnes til Bjørnatrynet og tunell til Moberg
3. Bru frå Svarvahellaholmen på Tysnes til Røtinga og tunell til Moberg
4. Bru frå Svarvahellaholmen på Tysnes til Røtinga, dagline til Halhjem og tunell til Moberg.
Det var den siste av desse fire alternativa Eikenes fekk beskjed om berre å leggja bort med éin gong.
– Alternativet i dagen over Øyane kan du berre legga i ei skuff og låsa godt igjen, kommenterte Emil Tetlie Brimsholm til jubel frå salen.
Tidleg i prosessen
Med på presentasjonen var òg vegsjef Helge Eidsnes og fylkesordførar Tom-Christer Nilsen (H).
– No jobbar vi med eit utkast til planprogram som blir lagt fram til offentleg høyring våren 2015.
– Der skal vi seie kva korridorar som skal utgreiiast og kva premissar som skal leggast til grunn.
– Vi er i ei tidleg fase i planprogrammet, forklarte vegsjefen.
På sykkel over Bjørnafjorden
Eikenes heldt fram med å forklara kva omsyn dei i prosessen.
– Vi har satt nokre mål for prosjektet. Det handlar om redusert reisetid og -kostnader, trafikktryggleik, mobilitet og å skapa ei kjeda samanhengande bu- og arbeidsmarknad.
– Vi skal òg finna ei løysing for syklande langs traseen og over Bjørnafjorden.
– Og det skal gjerast med god arkitektur, for omgjevelsane, dei reisande slik at vegen blir ein attraksjon.
– Når vi skal finna ut kva alternativ som er det beste så gjer vi ei samfunnsøkonomisk nytte, kor vi vurderar både prissatte konsekvensar med kost-nytte og ikkje prissatte konsekvensar, miljøtemaer.
– Tilsaman gjev dette oss ei samla vurdering som vi saman med andre verknader byggjer vår anbefaling på, forklarte Eikenes.
Tre bru-alternativ
Fleire har stilt spørsmålstegn med om det er teknologisk mogleg å kryssa Bjørnafjorden med ei bru. Det var Eikenes tydeleg på at det er.
– Er det utopisk å byggje ei så lang flytebru, spurde Eikenes retorisk.
– Nei, det er det ikkje, svara ho seg sjølv, før ho utdjupa.
– Vi ser for oss tre ulike teknologiske alternativ.
– Ei TLP-flytebru, ei tradisjonell flytebru eller ei røyrbru.
– Kompetansen finnst for å løysa alle desse tre alternativa, presiserte prosjektleiaren.
– Kom med innspel
I dei ikkje prissatte konsekvensane ligg miljøtema som omsyn til det visuelle landskapet, nærmiljø og friluftsliv, kulturminne, naturmangfald og naturressursar.
– I planprogrammet skal vi si kva vi skal utgreiia vidare. Vi må ha med oss minimum to alternativ før vi forankrar planen med ei konsekvensutgreiing som kjem til høyring våren 2016.
– Allereie no vil eg oppmoda dykk om å koma med innspel, avslutta Eikenes.