Populært treffpunkt
Unge som har kreft i familien har sidan april i år hatt tilbod om å treffast. – Det har vore veldig kjekt å sjå korleis ungane støttar kvarandre, seier Sigbjørg Eriksson.
I april fortalte vi om den nye kommunale tenesta, Treffpunkt, med nytilsett kreftkoordinator i Os, kreftsjukepleiar Sigbjørg Eriksson.
– Det kan vera godt for unge som har foreldre, besteforeldre eller søsken som er kreftsjuke, å møta andre ungar i same situasjon, seier Eriksson.
Treffpunkt, som hadde oppstart 22. april i Os, er eit tilbod éin måndag i månaden, for ungar mellom 6 og 16 år.
– Vi har hatt 10 ungar på Treffpunkt i vår og har plass til fleire. Før sommaren hadde vi ei fin samling på Ramsholmen, med grilling, fisking og bading, i morgon startar vi opp igjen.
Samtalar, leik og baking
Eriksson fortel at målet er at ungane, ved å treffast, leika saman og i gruppesamtalar, skal finna trøyst og støtte.
– Vi har samtalar der alle fortel kvifor dei er der. Nokre har gjerne opplevd at slektningen nyleg har blitt sjuk, at sjukdomen har forverra seg, at dei har hatt problem med å få sova eller at nokon har kome med dumme kommentarar på skulen.
– Då kan det vera godt å høyra at andre har opplevd noko liknande, og korleis dei har hatt det. Ungane er veldig flinke til å snakka med kvarandre og hjelpa, samtidig som det kan vera godt å vera saman med nokon dei har dette til felles med.
Utanom samtalane er det leik, aktivitetar og matlaging på programmet.
– Det skal vera eit lågterskeltilbd der ungane kan delta dei måndagane det passar, seier Sigbjørg, og viser til ein brosjyre om tilbodet som ligg på kommunen sine heimesider.