Politiet fann «sakna» drosjepassasjer
Politiet natt til laurdag: Røyk frå tak, amper stemning i sentrum, velta tre og funn av nedkjølt mann.
Fredag i 19-tida kom det melding om mogleg branntillaup på eit tak i Halhjemsmarka.
Det var røyk frå taket, men denne viste seg i koma frå arbeid på taket og det var ikkje fare for brann.
Tre blokkerte veg
I 2-tida natt til laurdag fekk politiet melding om velta tre på Drange.
– Treet blokkerte vegen til Drange, i tillegg hadde det tatt med seg ei telefonlinje på veg ned, fortel politibetjent Janne Samuelsen.
Vegtrafikksentralen blei varsla og tok hand om treet og vidare varsling til Telenor.
Amper stemning
Mellom klokka 3 og 4 i natt fekk politiet melding om fyll og amper stemning i Os sentrum.
Patruljen fekk kontakt med dei aktuelle personane og det roa seg på staden. Det er ikkje oppretta sak.
Leitte etter «sakna» drosjepassasjer
Laurdag morgon ringte Os Taxi til politiet.
– Ein ung mann i Lysefjorden hade ringt etter drosje to gongar. Då drosjesjåføren ikkje fann passasjerern blei han uroleg.
Politiet køyrde til Lysefjorden og fann mannen våt og nedkjølt, men oppegåande, vandrande langs vegen.
Han blei tatt med til legevakt for sjekk og blei funnen i fin nok form til å køyrast heim.