Poengdeling i 3. divisjon
Både Os og Lysekloster spelte uavgjort på bortebane laurdag.
I dag spelte begge dei to 3. divisjonslaga i Os bortekamp. Begge reiste heim med berre eitt poeng.
– Det var heilt greit med poengdeling i dag. Men ferjeturen heim blei litt kjip, for vi leia 2-1 til eit feildømt frispark frå 17 meter blei skote i målet vårt 1,5 minutt på overtid, seier Lysekloster-trenar Thomas Sandal.
Også Os-trenaren seier dei var ikkje langt ifrå siger, men at uavgjort var OK.
– Vaulen starta voldsomt aggressivt, men vi heldt strukturen, var kyniske og skapte ein del meir enn Vaulen. Blant anna sto Stian åleine og heada over frå tre meter, i tillegg var Erik Kanestrøm nær skåring, seier Tore Nielsen.
Stord - Lysekloster 2-2 (1-1)
Målskårarar, Lysekloster: Lars Henrik Skage og Kim Kleivedalen (straffe)
– Eg er nøgd med at vi speler ein gog bortekamp på gras, mot eit godt lag som Stord. Kjetil Hansen gjorde ein god kamp i mål og juniorspelar Preben Skorpen kom inn etter pause og spelte ein veldig god omgang. Så får det heller vera at vi ikkje fekk alle poenga i dag.
Lysekloster: Kjetil Hansen - Baste Jonassen, Eirik Indredavik, Steffen Finsådal, Sigve Rørstad - Frode Buvik, Johannes Jordal, Martin Røttingen Eidsvik - Joakim Hovden, Lars Henrik Skage og Kim Kleivedalen.
Innbytarar med speletid: Preben Skorpen, Eirik Musland og Mattias Høiland.
Vaulen - Os 0-0
– Vaulen kjempa godt og er nok sterkare heime enn borte. Eg synes vi skapte meir, men poengdeling er greit i ein kamp som denne. Kloven var veldig god dei gongane det var noko for han å gjera, Børge stråler framleis i midtforsvaret, i dag saman med Torkel i Per sitt fråvær.
Os: Anders Kloven - Stian Bakke, Børge Borgen, Torkel Hjertnes, Glenn Krossøy - Stian Lunde, Tore Valvik - Egil Thuen, Preben Borgen, Erik Kanestrøm - Christer Olsen.
Innbytarar med speletid: Mats Lepsøe og Roar Vestbø.
Berre Øystese har full pott etter tre rundar. Os ligg på plassen bak med 7 poeng, Lysekloster på 5. plass med 4 poeng.
Lysekloster 2 speler bortekamp mot Trott søndag, Os 2 speler heimekamp mot Trio klokka 14.00.