Petter tek over for Prikken

Bildeserie:

Full skjerm

1 av 3

Det første som slår ein når ein kjem inn i den nyoppussa 145 kvadratmeterstore Instinct-butikken i Telthuskvartalet er at den virkar mykje større enn før.

– Det vi har gjort er at vi har opna opp mot Baronselva ved å fjerna noko av innreiinga og gittera framfor vindauga. I tillegg har vi fått inn to store speglar som er med på å gje butikken eit nytt uttrykk.

– Vi har òg malt og skifta alt av innreiing, fortel Petter Hanøy, som no tek over som dagleg leiar etter legendariske Steinar "Prikken" Bøe.

Lang erfaring

Noko mindre røynd enn Steinar er Petter ikkje.

– Eg har 39 år firmaet, seinest fem år frå butikken vi hadde på Xhibition i Bergen. Før det har eg vore på torget og i Hollandergaten, fortel Petter.

– Petter har vore byavdelingene våre, ler Prikken, som framleis vil vera å treffa i butikken på Os, men no "berre" som vanleg tilsett.

– Kor lenge blir du å sjå i butikken då?

– I oktober har eg vore i selskapet i 45 år. Eg må jo ha noko å halda på med, så så lenge dei vil ha meg, så kjem eg nok til å vera her.

– Steinar er jo Instinct på Os, det er han som har bygd opp kundegrunnlaget og kjenner kundene. Eg er glad for å ha han med vidare, kommenterer Petter audmjukt.

Som ein familiebedrift

I 14 dager har dei helde butikken stengd for å pusse opp og gjera den ny.

– Du må få med Camilla (Skudal, journ.mrk). Ho er den som har stått for interiørdesignet. Det er så kjekt å ha flinke folk i firmaet. Til dagleg jobbar ho som dagleg leiar på butikken vår i Horisont i Åsane. Der har ho vore i 20 år, skryt Steinar.

– Kva er det som gjer at de alle har så lang fartstid. 20, 39 og 45 år er vel ikkje så vanleg i dag?

– Det er eit lite og kjekt firma å jobbe i. Vi er gode kollegaer og har eit godt miljø. Du veit vi blir nesten som ei familiebedrift, sjølv om vi ikkje er i familie. I tillegg er det kjekt å jobba ein plass kor service og varekunnskap blir verdsatt, smiler dei tre.

Funne nisjen

Instinct-kjeda består av fire butikkar i Bergensområdet med butikkar på Sartor, Horisont i Åsane, Vestkanten og Os. I tillegg har dei butikkar på Tasta i Stavanger og på Lambertseter i Oslo.

– Det er klart konkurransen er tøff, men eg trur vi har funne vår nisje i marknaden gjennom mange år. Vi har 5-6 store leverandørar som vi samarbeider godt med, fortel Petter Hanøy.

– Vi ligg i mellomskiktet på pris, så eg opplever ikkje dei store billigkjedene som konkurrentar. Butikkane går bra, men vi må stå på kvar einaste dag, supplerar Prikken.

Lanserer nytt merke

Det er ikkje berre butikken på Øyro som no blir ny. Også delar av varesortimentet blir nytt.

– Det er veldig kjekt å kunne presentera Tiger of Sweden som eit nytt merke. Dette er ein kolleksjon som både vaksne menn og ungdommar er interessert i. Leveransen har diverre blitt litt forsinka til opninga, men det er ikkje langt unna.

– Vi har fått veldig gode tilbakemeldingar på at det merket kjem inn, så vi gler oss veldig til å kunne presentera det for osingane, avsluttar Petter og Prikken.