Pangstart for Havnechefen
Både restauranten og uterestauranten i nybygget på Torget blei fylt raskt opp under dagens opningsfest under Vårsleppet i Os sentrum.
Bildeserie:
Dei første kundane kom inn døra i det den opna klokka 10 i dag, ein god time seinare var det fullt hus.
Fire månadar bak skjema sto bygget klart nok til ein «varsam» opning.
– Det blei ein travel innspurt likevel, seier kokk og medeigar Frank Vasby Bruarøy.
Han sto til klokka 2 i natt for å preppa opp varer til opningsdagen, og for å laga klar catering til ein konfirmasjon som skulle leverast i dag.
Med seg på kjøkkenet har han fått Ghader frå Syria, som har fartstid som kokk i den store, syriske hamnebyen Latakia.
Nytt og heimelaga
Den over 100 kvadratmeter store takterrassen skal byggast ferdig i mai for offisiell opningsfest siste helga i mai.
Drivarane har nytta ventetida godt. Møblar er monterte, bord er pussa, gamle eplekassar frå Utne og eit trau frå Osterøy utgjer delar av innreiinga.
Havnechefen startar med ein redusert meny, og vil utvida framover mot offisiell opning. Utvalet er supplert med økologiske salsvarer, juice, bakst og mjøl frå Godt Brød.
I restauranten er òg ein stor kultivator (innandørs drivhus), der tolv ulike urter allereie har byrja å spira godt.
– Det er kjekt med fint vêr på opningsdagen, men det skal bli godt med endå høgare temperatur, ferdig takterrasse og full drift på den nye ismaskina vår med italiensk is og yoghurt-is, seier dei etterkvart så travle havnechefane.