På vinterføre mot Bjarg
Ein 14-åring, ein 15-åring og ein amerikanar debuterte då Os spelte årets første treningskamp.
Bildeserie:
Laurdag spelte Os årets første treningskamp.
Kampen var planlagt på Stavollen, men laurdag formiddag viste det seg at Kuventræ var best eigna etter alt snøfallet i går.
Bjarg var best før pause. Os hadde nokre fine angrep, eit par cornarar og ein dobbeltsjanse, men gjestane var tøffare i duellane og fekk det betre til på det vanskelege føret.
– Det blei for puslete av oss i starten, men dette snakka vi om i pausen og det kom seg i andre omgang, seier assistenttrenar Ørjan Håland, som leia Os i dag.
Bjarg spelte delar av 2. omgang med 10 mann etter at ein av spelarane fekk direkte raudt.
Os - Bjarg 2-2 (0-2)
Målskårarar, Os: Fabian Bødtker og Glenn Krossøy
Os spelte utan blant andre El Fakiri, Mikkelsen, Brenne og Kvittingen-brørne, men hadde med seg fleire unge talent, som Thomas Lunde Fosen, Steffen Ljosheim, Torgeir Lunde og Fabian Bødtker frå start.
Dei hadde også med seg ein ny spelar frå USA, som Devante hadde med seg då han kom tilbake etter juleferie.
– Det er første gong eg speler på vinterføre, men det var kjekt! synest Max Oldham, som ironisk nok var blant dei på Os som såg ut til å klara seg best på glatten.
– Max er rask, teknisk og flittig. Eg likte energien hans, seier Håland.
Skeie og Kolskogen debuterte
Vegard Strønen Skeie, som fylte 15 år i haust, og Ole Martin Kolskogen, som fyller 15 år i år, debuterte i seniorfotball då dei kom innpå i andre omgang.
– Vi fekk veta på torsdag at vi kanskje var aktuelle. Fredag blei det stadfesta, men det var først i 11-12-tida i dag at det blei klart at kampen blei spelt, seier Vegard.
Ingen av dei har spelt for Os 2 før, seniordebuten kom i treningskamp med A-laget. Begge likte seg mot eit Bjarg med langt høgare snittalder.
– Dei klarte seg veldig fint og dei er to talent som vi kjem til å venta meir av, og stilla høgare krav til i tida som kjem, seier Ørjan.
Trenaren er òg imponert over Fabian Bødtker, som både jobbar hardt og vågar.
– Han var god i debuten borte mot Haugesund i haust og han var god i dag. Kjekt at han òg fekk seg ei skåring, kald og fin åleine med keeper.