På norsk igjen

Ikkje sidan Punishment Park-tida har Kjell Engelsen Moberg spelt inn låt med norsk tekst. Det som fekk han på morsmål igjen er ikkje kva som helst låt.

- Det var stort då punkrockbandet Hærverk tidleg på 80-talet kom med «Produkt av 70-åra».

- Eg hugsar dei fekk EP-en på ungdomsklubben, men han som styrte musikken ikkje ville spela den. Det enda med at eg og ein kamerat «adopterte» EP-en med oss heim, fortel Kjell.

EP-en blei den einaste Hærverk gav ut. Låta «Produkt av 70-åra» blei den første låta Kjell lærte seg på gitar. På albumet han no held på å spela inn, det tredje med K-JELL, gjer han ein coverversjon av klassikaren.

Resten av låtane er på engelsk og sjølvskrivne. Dei andre medlemmane i K-JELL er Bjørn Tore «BT» Kronen Taranger (trommer), Steinar Hjelmbrekke (gitar) og Audun Havåg (bass).

Rosa verd - utan raud tråd
Tittelen på det komande albumet er «People like us in a pretty pink world». Som vanleg frå Moberg sin leir er det verken tittelspor eller ein tråd raud nok til å forsvara tittelen på albumet.

Litt rosa er det likevel for Kjell, som ser ut til å ha posisjonert seg godt i verdas mest folkerike nasjon:

• Har eit samla opplag (singler og album) på 50.000
• K-JELL er på til saman 150.000 samlecd-ar i Kina
• Har gjeve ut 8 Bergen Rock cd-ar, 13 Norwegian Wood og plater for over 30 artistar på eige plateselskap, October Party Records, si avdeling i Kina.
• Har spelt for 10.000 i Beijing (sjå video på YouTube)
• Blir saman med bandet tatt imot som stjerner av både publikum og leiinga av den største rockefestivalen i Kina, Midi Music Festival.

- Vi har hatt gode kontaktar og gjort mykje rett, det ser eg no. Både K-KJELL og norsk rock har blitt godt mottatt, og stort opplag, låg cd-pris og to turnear (tre med JEF-turneen) gjer at vi møter ferdigdekorert fans ville etter autografar og fotorunde. Det er ville tilstandar!

Dei to kontoane
Kjell fortel at spørsmål om kva han tener satsinga i Kina er vanleg kost.

- Vi får dekka reise, opphald og litt lommepengar på cd-salet. Konsertane kan vi ikkje ta inntekt på, då vi reiser utan arbeidsløyve.

- Men eg ser på det som om vi har to kontoar, éin som vi fyller med nok pengar til å dekka turen, éin som vi fyller med opplevingar. Vi er i fast jobb og treng ikkje tena noko på dette, kontoen for opplevingar er den viktigaste.

Fleire kroner kan det likevel bli. Frå å starta med det nykomarane i Kina tar for cd-ane sine, 10-15 kroner, kjem tredjealbumet til å kosta det tredoble.

- Vi har fått oss eit namn og nærmar oss no ein pris på høgde med dei store kinesiske banda. Når vi tar «People like us in a pretty pink world» med oss austover til våren, er det nok til ein endå betre marknad enn før.

Ikkje Noreg?
- Har førre nobelsprisutdeling og merksemda som har vore rundt den fått noko å seia for din aktivitet og butikk i Kina?

- Nei. Kontaktane mine i Kina var litt urolege i starten, for kva som kom til å skje, men alt tyder på at det er business as usual.

- Kva med heimlandet, satsar K-JELL noko her i det heile tatt?

- Lite. Vi har vore med på den jobben det er å gje ut plater og stå på med spelejobbar her heime. Vi byrjar å bli vaksne karar, då er det lett å velja Kina, der vi kjem til duk og dekka bord og blir så godt tatt imot.

- Men eg har tenkt på å prøva å bli litt meir synleg her i Noreg, så det kan bli noko auka aktivitet på heimebane dette året.

Fest og gravøl
K-JELL lover ikkje å spela noko frå det komande albumet på Os Rockeklubb sin 30-årsfest i Fjellheim laurdag 5. februar.

- Men det kan henda éi av låtane blir spelt for første gong på denne festen.

For å promotera festen og bandet, og for å gje noko til den siste faghandelen innan musikk i Os, har han gjeve Musikkverket på AMFI Os nokre bunkar med eksemplar av dei to første K-JELL-albuma, «Refreshing Power og «You can´t kill rock N roll».

- Desse kan Tor Owe Rennemo dela ut gratis fram til han stenger i slutten av februar. Det er trist å mista ein sånn butikk, ein plass der nokon kan anbefala deg musikk som liknar på den Tor Owe veit du liker frå før, synes Kjell Engelsen Moberg.