– På alder med mor mi
Gamle og nye samlarar deltok på det som blei rekord for Ulvenmarknaden.
Bildeserie:
– Eg kjøpte bilen i september og har plan om å restaurera den, seier André Birkeland.
Mange reiste eit stykke for å koma til Ulvenmarknaden i Kolskogen laurdag, men André er frå Os og ferskt medlem i VWACB (Volkswagen Auto Club Bergen).
– Eg synes det er litt artig at bilen er registrert 10 dagar etter at mor mi blei fødd, seier Birkeland om 61-årgangen av folkevogna.
– Kvifor blei det boble då du skulle ha deg ein veteranbil?
– Dei er lette å skru på, har fin design og interessant mekanikk.
Vidare til Teistlo
Om bobledesignen er folkeleg, fin og tidlaus er ikkje alle folkevognene like. Ein spesiell variant med namnet Variant var i utstillinga, det var også ein 62' Karmann Ghia, ei sporty boble med snev av italienar over seg.
VWACB-klubben har cirka 300 medlemmar. Laurdag formiddag var drygt 20 av dei på finbil-parkeringa på Ulvenmarknaden med bilane sine. Etterpå gjekk turen til Tistlo på Voss, kalla Tistlo Run.
Har du problem med å finna Tistlo på kartet over Voss er kanskje ikkje det så rart. Tistlo er nemleg kallenamnet på eit medlem i klubben, Christer Haga Helle.
– Det blir kaffi og sveler heime hos oss på Bulken før vi kjører vidare, seier mamma Britt Haga, som forresten også er eigar av den flotte Karmann Ghia-bobla.
– Truleg rekord
– Det blei ein kanonbra marknad med kjempeinnsats av alle frå Os Skysslag på dugnad.
– Igjen var vi heldig med vêret, trass i nokre byger på morgonkvisten, så besøket og handelen blei veldig bra, truleg er dette rekord, seier Gustav Bahus.
I tillegg til marknaden, der folk "kjem som dei er og tar med det dei har" er finbil-parkeringa, ei flott samling av 50-100 veteranbilar, ei utstilling som skiftar litt i løpet av dagen.
– Nokre står heile dagen medan enkelte klubbar kjem og er nokre timar før dei kjører vidare. I år var det ekstra mange klubbar på tur så det blei eit variert og spennande utval i utstillinga, seier Bahus om årets versjon av Ulvenmarknaden.