Over ein halv milliard i omsetning

Senterleiar Silje Lygre på Amfi Os offentleggjorde onsdag omsetningstala for 2015.

– Vi ser tilbake på nok eit år med rekordomsetning.

– Den samla omsetninga på heile senteret blei på over 552 millionar kroner, noko som tilsvarar ei auke på heile 5,32 % (mot 3,01 % vekst året før).

– Dette er særs gledeleg, spesielt med tanke på at senteret også hadde ei særs positiv utvikling i 2014, seier Lygre i ei pressemelding.

77 millionar julekroner

Av dei 552 millionane kjem over 77 millionar kroner frå julehandelen.

– Fjorårets julehandel starta med eit brak under Black Friday, då vi opna dørene allereie klokka sju om morgonen. Kundane sto i kø utanfor butikkane og vi fekk ei samla omsetningsauke på heile 84 % denne siste fredagen i november. Etter det var det full rulle heilt fram til jul, fortel senterleiaren.

Byggjer om Europris

Lygre fortel at dei er nøgd med utviklinga på senteret, men at dei vil helda fram med å utvikla det vidare.

– Det er viktig at vi heile vegen utviklar oss og er med å sikra eit godt tilbod til osingane og kommunane rundt.

– Det kjem til å skje ein del ting på Amfi Os også i 2016. Noko av det første kundane kanskje vil merka er ombygginga av Europris. Vi reknar med ferdigstillelse i løpet av hausten.

– Vi er takknemlege for at osingane brukar oss og på den måten er med å sikra trygge, lokale arbeidsplassar, avsluttar Lygre.