Over 600 nye innbyggarar

Fredag kom SSB.no med folketalet etter fjerde kvartal 2015.

Os kommune avslutta 2015 og gjekk inn i 2016 med 19.742 innbyggarar.

Nettoveksten, som var på 645 innbyggarar i 2015, er den største nokosinne. Rekorden på 536 frå 2013 blei slått med over 100. I 2014 auka vi med 419.

– Med denne veksten er vi den sjette raskast veksande kommunen i Noreg, seier ordførar Terje Søviknes.

– Det ha vore to dagar på rad med gode nyhende, men millionoverskotet vi fekk presentert i formannskapet i går, og folkeveksten, som òg får konsekvensar for kommuneøkonomien.

Inntektssystemet tar utgangspunkt i tal frå 30. juni og 1. januar. Ordøraren reknar med at veksten vil gje auka overføringar i tillegg til å auka snittet (siste tre år) som påverkar veksttilskotet til kommunen.

– Med god økonom er det lettare å ta investeringane som må til for å førebu seg på vidare vekst.

På tampen av 1977 passerte vi 10.000 innbyggarar, i 2006 blei vi 15.000 og i 2016 vil vi, om så veksta blir halvert i forhold til 2015, passera 20.000 innbyggarar i Os.

Osing nummer 20.000

Onsdag 18. januar 2006, under profillanseringa til Os Inspirerer, blei Susanne Linde trekt ut som osing nummer 15.000.

Då det ikkje lykkast kommunen å få folkeregisteret til å peika på osing nummer 15.000, velte dei å kåra ein nyfødd unge som vart fødd mellom 1. mars og 1.oktober 2005.

- Vi fekk veta at Susanne var trekt ut like før jul. Det har ikkje vore lett å halda det hemmeleg i ein månad, sa mamma Gunn Alice til Midtsiden for ti år sidan.

Pappa Kim Ove, dottera Stine Louice (som då var 13 1/2) og brørne Dennis (8) og Oliver (6 1/2) var alle med på scenen då dei blei overrekt gratulasjonar og gåver.

– Med mindre veksten flatar veldig ut vil vi passera 20.000 i løpet av første halvår. Også denne gong vil vi gjera stas på osing nummer 20.000, men det er førebels uvisst korleis det skal organiserast. Vi vil undersøkja om det går an å faktisk finna ut meir presist kor tid, og kven som gjer at vi passerer dette talet.

Meir Os Inspirerer

I 2004, i samband med utarbeiding av kommuneplanen for Os 2004-16, engasjerte kommunen kommunikasjonshuset Grey World Wide i prosjektet som førte til Os Insirerer-slagordet.

Det blei utvikla visjon, verdigrunnlag, slagord og profilprogram som blei lansert i januar 2006.

– Det er 10 år sidan no. Vi vil i år gjera eit stykke arbeid for å revitalisera Os Insirerer. Dei fleste delmåla er nådd og vi treng nye. Grunnverdiane er dei same, men vi vil sjå om vi klarer å systematisera den grafiske profilen endå betre.

– Blir det ein ny runde med eksternt byrå?

– Nei. Denne gong tar vi det sjølv.

65 år med vekst

SSB.no viser statistikk tilbake til 1951. Os kommune har hatt vekst alle desse åra.

I 1951 auka vi med 201, i 1955 berre med 21.

Frå 1973 til 1974 auka veksten frå 175 til 379, i 1993 var vi nede i 44, i 2007 sette vi med 460 ny rekord. Det gjorde vi òg med 526 i 2010.

Les òg:

• Rekordstor folkevekst i Os (passerte 200 på eitt kvartal)

• Desse tala overraskar ordførar og meklarar (første kvartal med nedgang på 13 år)