Osingar opplevde tunneldramaet
Til saman 66 personar blei sendt til sjukehus etter brannen i Gudvangatunnelen måndag. Fleire av dei som opplevde dramaet er frå Os.
"Jeg sa at jeg vet ikke om vi kommer til å overleve. Det var full panikk i bussen, tre kilometer til frisk luft og vi så ingenting" sa Kirsten Lindén til VG.no i går.
Ho ringte heim til sonen etter at ho og Anders Lunde hadde redda seg inn på ein buss med turistar frå Thailand etter brannen i Gudvangatunnelen måndag.
Dei to osingane var på veg på campingferie då vogntoget framfor dei byrja å brenna i tunnelen. Ein personbil mellom dei og vogntoget gav gass og kjørte forbi det brennande vogntoget, men Lunde ville ikkje så tett på brannen med gassen han hadde i campingvogna.
Dei rømte frå bil og hundane i campingvogna for å koma seg ut til fots, men røyken var så tjukk at dei gjekk rett i tunnelveggen fleire gongar.
Så gjekk dei rett i ein buss, og kom seg om bord i denne og ut av tunnelen.
Ingen omkom i den dramatiske brannen, som oppsto i eit austeuropeisk vogntog og fylte den 11,4 kilometer lange tunnelen med røyk, men 66 blei frakta til sjukehus, 6 av dei med alvorlege røykskader, ifølgje BT.no.
BT har intervjua Trygve Klakegg frå Søfteland i Os. Han blei verande i bilen sin til ein brannmann kom og sendte han i marsj ut av tunnelen.
"På vei ut gikk jeg forbi den utbrente lastebilen. Jeg registrerte at ting falt ned rundt meg. Alt lå hulter til bulter" seier Klakegg til BT.no.
Midtsiden kjenner til at også andre osingar opplevde dramatikken i tunnelen.
Var du blant dei? Kontakt Midtsiden på 90789270 eller kjetil@midtsiden.no.