Osingar klare for Modball
Laurdag startar årets Modball i London. På 6 dagar skal Lennart Eide og Martin Dale innom 12 land, i kortesje med fleire stilige bilar.
Bildeserie:
– Modball er ein folkeleg versjon av Gumball, seier Lennart Eide (22).
Torsdag kjører han mot Kristiansand og vidare til Danmark og London for å delta i Modball 2013, som startar laurdag.
– Den største forskjellen er vel startkontingenten, som ligg på rundt 300.000 kroner om du vil delta i Gumball, mot rundt 12.000, inkludert seks overnattingar, i Modball.
180 bilar innom 12 land
Etter velkomstfest fredag startar Modball i London laurdag 22. juni.
Turen går vidare gjennom 12 land, med pitstop i 8 byar etter avreise frå London; Amsterdam – Luxembourg – Zürich – Milano – Venezia – Wien – Bratislava – Praha.
– På stoppestadane blir det som ei lita bilmesse, der alle dei 180 påmeldte bilane står utstilt. I tillegg blir det ein del fellesmiddagar og festar, seier Eide.
Det var ein kollega av han som fekk han på tanken å melda seg på. Han var nemleg med i første Modball i 2007.
265 hestekrefter
Sjølv kjører Lennart ein BMW Z4 Coupé med 265 hestekrefter. Eide har eigd bilen, som er ein 2007-modell, i 2 år.
– Eg har nok verken den største eller minste motoren i løpet, det er alt frå Ferrari til veteranbilar med i løpet.
– Dessutan er det ikkje kappkjøring, det er berre ein tur med sjekkpunkt og show.
Lagde filmsnutt på Os kai
I dag kom dei siste klistremerkene på bilen, som no er heilfoliert med sponsorreklame.
– Du må ha ein del merke på bilen for å delta, sponsorar til løpet og eigne sponsorar, seier Eide, som har fått sponsa blant anna nye bremser og sjølve dekoren.
På Os kai var det film- og photoshoot midt på dagen i dag, noko som tiltrekte seg litt merksemd frå unge og gamle på veg til og frå Oseana og Vikjo.
Fleire frå Noreg
Med seg som "kartlesar" har Lennart kameraten Martin Dale, som han gjekk på ungdomsskule med.
– Han brukte ikkje lang tid på å takka ja, ler Lennart.
– Eg var ein av dei første norske som meldte seg på, men no har det kome fleire. Vi skal reisa saman med to andre bilar frå Bergen, ein BMW 330 og ein Audi A5.
– Og så skal vi møta éin frå Stavanger i Kristiansand og nokre kjørarar frå Oslo når vi kjem til Danmark. Så kjører vi vidare den litt harde etappen mot ferja over til England, seier Lennart og Martin.