Osingane feira 17. mai på jobb og på ferie
Midtsiden har fått helsingar og bilde frå Lysefjorden, Stavanger, Veslefrikk, Puerto Rico og Seattle.
Bildeserie:
Då Midtsiden inviterte lesarane til å dela sine bilde frå feiringar utanfor Os sentrum fekk vi både kortreiste bilde frå Lysefjorden og Stavanger, frå folk på jobb on- og offshore, og frå osingar som fekk med seg feiring og tog i utlandet.
Pølser og is på dekk
Mens Ramo Racic og Kristian Bødtker sat i Stavanger og gjorde offshore-jobb på land, frå techsenteret Bacon for Baker Hughes, var Ingvar Bjørkhaug på Veslefrikk.
– Her blir det servert pølser og is på dekk. Stemninga er god, skriv Ingvar frå Oceaneering Inspection team på epost til Midtsiden.
Rekordlangt tog i Lysefjorden
– Dette er første gong eg har feira 17. mai i Lysefjorden, og eg er imponert! seier André Marton Pedersen.
Han fortel om eit innnhaldsrikt program framført på historisk grunn i ruinane etter Lyse kloster. Skulekorpset spelte og Lysekloster barnehage song. Toget gjekk til Lysekloster barneskule, der det var gåver til ungane, mange leikar og, ikkje minst, eit hoppeslott!
– Det har vore ei tung og spesiell tid i Lysefjorden i det siste, så eg synest det var fint å samlast og feira noko positivt, demokrati, fridom og det å bry seg om kvarandre, seier André, og rosar formann i 17. maikomiteen, Ørjan Søviknes.
Happy Soot-n-duh My!
Midtsiden òg fått helsing frå Gran Canaria og Seattle.
– Vi er i Puerto Rico og har hatt ei fantastisk feiring på den norske skulen i nærleiken.
– Her har det vore tog og alt som høyrer med. Vêret var strålande med sol og 26 gradar, fortel Bente Prestøy og Bjarte Vevatne.
I Seattle, som skal vera blant dei som har lengst 17. maitog i verda etter Oslo, var det invitert på denne måten:
«Welcome to Seattle’s popular 17th of May Celebration, a.k.a. Syttende Mai [Soot-n-duh My].»
Nina, John Arve og Arild Halhjem er saman med Jarle Aspenes og Atle Vernet på USA-reise.
– Vi har vore her før, men aldri på 17. mai. Vi tok fly til San Francisco, der henta vi ei rosemalt kiste som søster til Arild har arva etter mor si. Både søster og bror til Arild bur i Seattle.
– Vi køyrde kysten oppover til Seattle, med stopp i Napa Valley, Eureka, Coos Bay og Portland. I Seattle har vi vore med familien til Arild, pluss en del andre kjente. Vi har hatt ein flott tur og ei strålande feiring, men skulle gjerne hatt endå meir tid her borte, seier Nina Halhjem.
Her finn du bildeseriar og videoar frå 17. maifeiringa i Os sentrum.