Osing tatt i nasjonal aksjon
Ein mann frå Os er tatt i samband med Kripos sin nasjonale politiaksjon mot seksuelle overgrep av barn.
Kripos har initiert ein nasjonal aksjon mot personar som deler bilde og film på internett som viser seksuelle overgrep mot barn.
Aksjonen er kalla "Operation Share". 68 saker over heile landet er som følgje av aksjonen oppretta. Fire av dei i Hordaland.
Ifølgje BT.no er tre av dei frå Bergen og éin frå Os.
– Vi har foretatt pågriping og ransaking, og datautstyr er beslaglagt. No blir det ein etterforskningsjobb å gjennomgå beslaga. Det er for tidleg å seia kor stort materialet er, seier politiadvokat Ørjan Ogne i Hordaland Politidistrikt til BT.
Samordna aksjon
I dei fleste sakene blei det aksjonert 4. desember etter at Kripos hadde gjort innleiande etterforsking mot personar som nyttar fildelingssystemet "eDonkey2000".
Kripos presiserer i ei pressemelding at det per no ikkje foreligg informasjon om fysisk overgrep i nokre av dei 68 sakane. Dette vil bli avklart gjennom vidare etterforsking i dei særskilte politidistrikta.
– Å beskytta barn mot overgrep er noko av det viktigaste vi kan gjera.
– Dei som deler bilde og filmar som viser overgrep mot barn skal veta at dei risikerer å bli tatt, både i aksjonar som dette og i det daglege politiarbeidet, seier Kjetil Haukaas, sjef i Kripos.
Lensmann Oddbjørn Dyrdal stadfestar at ein person frå Os er involvert i saka, men ønskjer førebels ikkje å kommentera saka.