Os vil veksa mest i fylket

Rett før helga slapp Hordaland Fylkeskommune ein ny rapport over venta folketalsutvikling og bustadbehov i fylket. Dette er tredje året på rad fylkeskommunen får utarbeidd eigne prognoser og tal.

– Hordaland er eit fylke med forventa sterk folkevekst, sjølv i ein periode med omstilling i industrien. Dette gir både fortrinn og utfordringar. Ei av utfordingane er å finne bustad til alle som ønskjer å busette seg her. Då treng vi eit best mogleg bilete av framtidas behov, seier Kathrin Jacobsen, analysesjef i regionalavdelinga i Hordaland Fylkeskommune.

Innen 2040 vil det vera behov for 88 000 fleire bustader i fylket. Det utgjer ein vekst på 3400 nye bustader årleg.

Fleire bustader for åleinebuande

Bergen og dei bynære kommunane Os, Osterøy, Meland, Radøy, Lindås, Askøy, Fjell, Sund og Øygarden (Bergensregionen), vil ha behov for 88 % av dei nye bustadene i Hordaland (78 000 bustader). 56 % av dei nye bustadene vil det vere behov for i Bergen. Det trengst nesten 39 000 fleire bustader for åleinebuande.

– Prognosen inneheld òg ei fordeling av hushald på typar bustader, som viser at hordalendingane må vere budde på å bu enda tettare i framtida, skal vi sikre ei berekraftig utbygging, seier analysesjefen.

–Gjennom god planlegging og samarbeid mellom kommunane er eg trygg på at vi kan finne fornuftige løysingar der innbyggjarane sin trivsel og sine behov er dekt samtidig med at vi nyttar areala på ei berekraftig måte.

Folkevekst med 76% i Os

Størst vekst er venta å kome i Os (i snitt 2,2 % per år), Meland (2,1 %), Sund, Fjell, Øygarden og Austevoll (1,8 %). 2,2 % per år over mange år vil vere veldig høgt heiter det i rapporten.

Folketalet på Os vil i så fall auke med 76 % frå 2014 til 2040, og stå for 94 % av den venta veksten i Bjørnefjorden.

Fleire eldre

Den venta eldrebølgja vil slå hardast ut for dei kommunane med relativt få eldre i dag. Fedje har den høgaste gjennomsnittsalderen i fylket, men er samtidig den einaste kommunen som vil få ein årleg vekst i innbyggjarar 75+ som er lågare enn den generelle folkeveksten i fylket. Dei resterande kommunane, og dermed alle regionane, har ein vekst i innbyggjarar 75+ lik eller over den generelle folkeveksten i fylket.

Fjell (i snitt 5,1 % per år), Os og Meland (begge 4,2 % årleg) og Sund (4,1 % årleg) er blant kommunane med lågast snittalder i dag, men har også høgast venta relativ vekst i innbyggjarar 75+ per år fram mot 2040.

Tala i prognonsen for Os

Berekningane i den oppdaterte rapporten syner følgande folketalsutvikling for Os (tal per 31.12)

2014: 19 097
2025: 24 910
2040: 33 654

Prosentvis veks kvart år 2,2%

Fordeling i alder i utvalde alderssegment (berekna for åra 2014/2025/2040)

1-5 år: 1481/1816/2298
6-15 år: 2697/3433/4493
75+: 993/1829/2909
Snittalder: 37,1/38,2/39,5