Os tok gull i veteran-NM
Null baklengs etter pause: – Vi har tatt mange medaljar, men dette var ein sterk og historisk finalesiger, seier lagleiar Gunn Nåmdal Røen.
Bildeserie:
Os jenter 50 vann i dag finalen i veteran-NM i handball med ein solid 11-3-siger over Fjellhamar i finalen.
– Vi har vore i finalen 5-6 gongar før, og tapt alle. Dei fleste gongane har vi tapt med tilsvarande siffer for nettopp Fjellhamar. Det var ekstra kjekt å vinna på denne måten, og mot dette laget, seier lagleiar Gunn Nåmdal Røen.
Ein omgang utan baklengsmål
Årets veteran-NM blei spelt i Stavanger.
Det sto 3-3 til pause i finalen. Så tetta Os heilt igjen, og slapp ikkje inn eit einaste mål i 2. omgang.
Sjølv var ikkje Gunn heilt tilbake frå ankelskade, og var lagleiar saman med Aina Bjørke Kallestad.
Os sin tropp, dei nybakte noregsmeisterane: Britt Helen Hjelle, Helga Tveit, Turid Randa, Grethe Jørgensen, Wenche Lunde Lepsøy, Anne Kjersti Storebø, Marianne Nåmdal, Elisabeth Størksen, Mariann Lyssand og Jannecke Monsen.
25 år i toppen
Jenter 50-laget frå Os består av spelarar frå damelaget som på 90-talet spelte i øvste divisjon.
– Dei som var med i år er frå 52 til 57 år i alder, fortel Røen.
Os har gjort det skarpt i veteran-NM i handball fleire gongar. Keeper Britt Helen Hjelle, som heldt buret reint ein heil omgang, var med for 25. gong.
Mens tre osingar var del av herrelaget frå Norrøna som vann i 2015, har veterandamene frå Os tatt bronse i blant anna 2012 og 2015, og vore i fleire finalar.
– Å endeleg gå heilt til topps var utruleg deilig! synest både lagleiarar og spelarar.