Os-speidarar til NM

– Det er så vidt vi veit første gong av osingar er kvalifisert til NM, seier speiderleiar Wenche Orrebakken.

Midtsiden har etter at saka første blei publisert fått opplyst at dei nok ikkje er dei første. I 2012 kvalifiserte også ei patrulje frå Os seg.

Kvalifiserte seg gjorde dei etter å ha delteke på vestlandsmeisterskapen i speiding i helga.

– Der konkurrerte vi mot 45 andre patruljer frå KFUK-KFUM-speidarane, NSF-speidarane og ei patrulje frå Sogn og Fjordane, fortel dei fem speidarane som no skal til Nøtterøy i Vestfold 15.-17. juni.

Patrulja består av: Andreas Severin Brattebø, Martin Bakke Slåttsveen, Matias Døsen Pontoppidan, Nikolai Døsen Pontoppidan og Emma Elisa Orrebakken.

Ei rekkje øvingar

Dei fem konkurrerte i ulike øvingar innan speiding som knuter, førstehjelp, pionering - kor ein byggjer møbler og reisverk ved hjelp av tau og stokkar, matlaging, orientering og ei valfri praktisk oppgåve.

– I tillegg så fekk vi inspeksjon kor dommarane såg at vi hadde orden i sakene våre. Vi fekk vel ikkje akkurat full score på oppvasken, smiler dei fem litt beskjemt.

– Det var også ei teorioppgåve med hundre spørsmål som vi skulle svara på i løpet av ein time. Det var spørsmål om alt mogleg frå kven som er statsminister i Noreg til kva tresort det var vi blei presentert.

– Men de var ikkje på hike?

– Nei, det er berre når vi er på leir. I desse konkurransane er det orientering som tel, fortel Matias, som også er aktiv orienteringsløpar i Os Orienteringsklubb.

Hadde ikkje øvd

Patrulja frå 1. Os KFUK-KFUM plukka med seg 355,75 poeng av 500 moglege under konkurransen.

– Det heldt til åttande plass totalt og andre plass i Bjørgvin Krins. Det er vi ganske nøgd med for dette var første gangen vi deltar og vi hadde ikkje øvd, så det gjekk overraskande bra.

– Kva med NM, kva tenkjer de om det?

– Vi skal i allefall øva på førehand. Vi har skrive ned kva som gjekk galt i helga og kva som gjorde at vi fekk poengtrekk, så vi satsar på å gjera det bedre i NM. Sjølvsagt håper vi på å vinna, men kjem vi på øvre halvdel så skal vi vel eigentleg vera nøgd, konkluderer speidarane etter å ha tenkt seg om.

I NM deltek omlag tusen speidarar fordelt på over hundre lag. Speidarane er i alderen 10 til 16 år.