Os signerte portugisisk U-landslagspelar
Tiago Ribeiro (23) går frå Mumbai City på øvste nivå i India til Os Fotball og norsk 3. divisjon. Også spanske Rafael Villén (24) er klar for å få Kuventræ som heimebane.
Bildeserie:
Os styrkar stallen med eigen hovudtrenar Hassan El Fakiri og comeback av Os-kaptein gjennom mange år, Stian Lunde, og den talentfulle angrepsspelaren Egil Thuen.
Fleire spelarar frå utlandet er på veg inn i A-stallen og i dag fekk klubben klarsignal frå forbundet på to av dei:
Sveitsisk-portugisiske Tiago Ribeiro (23) og spanske Rafael Villén (24) blei i dag speleklare for Os.
Dei stiller truleg mot Stord i opninga på haustsesongen mot Stord på Kuventræ i morgon.
– Dei siste åra har vi mista litt for mange av våre eigne mest erfarne seniorspelarar. Med den spelarutviklinga og den store mengda talentfulle gute- og juniorspelarar vi har i klubben er det viktig at vi har eit A-lag som dei kan strekka seg etter, seier formann i Os Fotball, Knut Haddal.
Direkte frå indisk toppfotball
Rafael Villén har bakgrunn frå tredje nivå i spansk fotball, Segunda B. Han er midtbanespelar, har bachelorgrad i tele- og kommunikasjon og snakker flytande engelsk.
Tiago Ribeiro har vore visekaptein på ungdomslaga til Benfica og på U16-, U17- og U18-landslaget til Portugal. Han har seinare spelt for Braga og Grasshoppers før han gjekk til Mumbai City på øvste nivå i India.
Sjå presentasjonsvideo av Tiago øvst i saken. (Han blir her presentert som midtstoppar, men har også spelt mykje offensivt i karrieren)
– Med El Fakiri sitt nettverk har vi gode kontaktar, ikkje berre i norsk toppfotball, men utanlands. Vi er veldig glade for at vi får tilgang på spelarar av dette kaliberet, seier formann i Os Fotball, Knut Haddal.
Fleire proffkontraktar
Det er signert proffkontrakt med både Ribeiro og Villén.
– Er det nye sponsorar som er inne og finansierer desse kontraktane?
– Nei, dette tar vi innafor rammene på budsjettet vi allereie har, seier Haddal.
Også ungdomane i klubben får nytte av signeringa, Tiago og Rafael kjem til å bidra innan Os-akademiet og resten av spelarutviklinga på Kuventræ.
I tillegg er klubben framleis i kontakt med nokre amerikanske spelarar som har vore på prøvespel, blant anna backen Devante Dubose og keeperen Andrew Todd.