Os sentrum+Amfi Os=Sant

Fredag morgon blei det kjent at dei to store handelssentra i Os går saman for å fronte handelsbygda Os.

– Nei, dette er inga aprilspøk. Os sentrum og Amfi Os går saman om å fronte Os som ein enkel og heilheitleg handelsstad. Vi har så mykje positivt å by på, seier Geir Amundsen i Os sentrum.

Felles magasin

Første steg på samarbeidet er å gje ut eit felles sommarmagasin.

– Det blir eit 50 siders magasin om Os som vi står saman om. Dei har proffe folk i Amfi-kjeda som står for produksjonen. Der blir det reportasjar frå alle butikkane på Amfi og i sentrum.

Felles front

Bakgrunnen for at dei to går saman er å gjera felles front.

– Vi må stå saman som ei eining mot konkurrentane utanfor bygda. Vi utfyller kvarandre på ein fin måte. I sentrum har vi produkter og tilbod dei ikkje har på Amfi. Tilsvarande har dei ting vi ikkje har, men tilsaman har vi det meste folk treng. Det er inga grunn å skulle reise ut av bygda for å handle, seier Amundsen.

Berre starten

Magasinet er berre starten på eit breiare samarbeid dei to organisasjonane mellom.

– Dette er berre starten på eit samarbeid. Døme på andre samarbeid er at når dei køyrer nattope, så heng vi oss på. Når vi køyrer marknadene våre, så vil fleire av deire butikkar kome ned her.

– Saman skal vi vise at vi har det meste i Os, avsluttar Amundsen.