Os-keeper opplevde tragedien i Nice
Andrew Todd sat på uterestaurant i Nice under massakren torsdag kveld. – Folk kom springande mot oss og ropte «bombe», så høyrde vi skyting, fortel Andrew.
Bildeserie:
Amerikanske Andrew Todd, som studerer i Bergen og kom til Os Fotball som keeper i fjor sommar, har brukt fotball-ferien til å reisa rundt i Europa.
Turen starta i Sveits 4. juli og gjekk vidare til italienske Milano før ankomst Frankrike og hamnebyen Nice tysdag 12. juli.
– Eg var i same gate, berre to kvartal unna der massakren skjedde, seier Andrew til Midtsiden.
Minst 84 blei drept av ein lastebl med skyttar som køyrde inn i ei folkemengde i Nice under nasjonaldagfeiringa i Frankrike.
Les òg: Brannsjefen i Os kom heim 11 timar før angrepet
– Folk kom springande mot oss. Så høyrde vi skot
Andrew reiser saman med kameraten Stefan Wingo. Dei to studerte saman i USA og Wingo tar no mastergrad i fornybar energi i Freiburg i Tyskland.
– Vi sat på ein restaurant som heiter Balthazar. Fyrverkeriet var nettopp ferdig då alle brått byrja å skrika og springa nedover hovudgata langs stranda.
– Nokre ropte «bombe», og så høyrde vi skyting. Det var fullstendig kaos!
Andrew, som hadde reist seg opp for å sjå kva som var på gang, gjekk tilbake til bordet der kameraten sat og sa at dei burde springa tilbake til hotellet.
– Vi sprang mellom store folkemengder, blant folk som sprang for livet, nedover gata og kom oss i tryggleik på hotellet.
Todd og Wingo bur på hotellet Boscolo Exedra Nice.
Takksam og i sorg
Andrew fortel om ein by og eit folk i sjokk og sorg i Nice i dag.
– Det er stille i gatene og folk er prega, fleire ser skremt og redd ut. Det ser ut som om turistane prøver å ha litt ferie, samtidig som alle er i sorg og sørger saman med pårørande.
I dag takkar Andrew venar og familie som har spurd om det står bra til med han:
«Everyone that has reached out to me seeing if I'm ok should know I love them and I really appreciate them checking up on me. I am still in Nice and was on the same street as the event but luckily I got out of there safely! Time to head back to safe and quiet Norway!»
Andrew er framleis i Nice og flyr heim til Bergen søndag 17. juli. Os startar haustsesongen borte mot Austevoll laurdag 6. august.