Os har sove i timen
100.000 besøker Pepperkakebyen i Bergen denne månaden. Få osingar viser seg fram i utstillinga.
Bildeserie:
Barnehagar, skular, bedrifter og privatpersonar har kvart år sidan 1991 vore med på å gjera Pepperkakebyen i Bergen til verdas største peparkakeby.
- Alle er velkomne til å bidra, også dei som kjem frå andre kommunar eller fylker. Eit år hadde vi Holmenkollen i utstillinga, i fjor var Nidarosdomen med, fortel dagleg leiar i Bergen Sentrum AS, Steinar Kristoffersen.
Nokre få frå Os, eller med interesser i Os, har også funne fram kjevla. Eit vegstykke i Hegglandsdalen står på ein fjellknaus med jernbane utanfor husdørene. Nede ved sjøen står fire blokker skilta med Os Sjøfront.
- Fleire bedrifter viser seg fram i utstillinga, de har ikkje noko imot reklameplassen dei får?
- Nei, vi er ikkje imot at bedrifter viser seg fram, vi er glad for alle bidrag.
I 2008 hadde Os, etter eit samarbeid mellom Os Turn Fotball, Os Sentrumsforening, Os kommune og fleire barnehagar i bygda, ei flott peparkakebygd i Visningssenteret i Hamnevegen.
Utstillinga viste Os sentrum i pepar, og dei fleste kjente bygningane var på plass. Ordførar Terje Søviknes stilte opp med ein heimebaka modell av Oseana, kunst- og kultursenteret som skal ha opningsfest i juni 2011.
Oseana hadde vore eit naturleg bidrag til årets pepperkakeby i Bergen, det hadde også Museet Lysøen vore, i jubileumsåret 2010.
- Vi hadde Ole Bulls villa frå Museet Lysøen eit år, og då vann dei pris. Det hadde vore kjekt å sjå villaen igjen, seier Kristoffersen.
Osbadet, som både er eit stilig bygg og ein attraktiv plass for mange utanfor Os kommune, bør vel også bakast til denne godt besøkte utstillinga i Bergen.
Pepperkakebyen i Bergen er open til og med nyttårsaftan.