Os friidrett nådde nye høgder
Opningsstemnet i helga: Fleire osingar sette ny pers og éin av deltakarane sprang årsbeste i Noreg på 800 meter.
Bildeserie:
– Vi var godt førebudd med bra bemanning, men no er vi heilt utmatta. Det blei nokre travle døgn, men det var veldig kjekt, seier Sverre Mowinckel-Nilsen frå Os Turn friidrett til Midtsiden måndag, dagen etter ei vellykka helg med opningsstemne og offisiell opning av Os Idrettspark.
– Bortsett frå litt tekniske utfordringar etter at vi la inn etterpåmeldte, som fekk alle startnummer til å forskyva seg, så gjekk det veldig fint å avvikla stemnet.Vi fekk også mange fine tilbakemeldingar på anlegget frå deltakarane frå tilreisande klubbar.
Les òg:
• Treffsikker opningsplan
• Favorittane vann politikarstafetten (med video)
• Persa med 10 cm (med video)
• Takka Mohn, Moberg og Borgen
– Vi er glade for alle påmeldte, rundt 150 ulike deltakarar med over 450 startar, for publikum som stilte opp og for alle som hjelpte til, ikkje minst speakerane Jan Helge Corneliussen og Tor Kleppe frå naboavdelinga vår, fotballen.
Mons Martin persa på 100 meter
Hans-Magnus Haukøy frå Gneist vann 800 meter med tida 2.04,99, som skal vera årsbeste i Noreg i klassen G14. Fleire frå arrangørklubben Os sette nye personlege rekordar.
– Gabriel Walden Michelsen (G15) sette ny pers i høgde, då han hoppa 1,68 meter, Sofie Olsvold Hausberg (J15) vann både 100 meter (14,10), lengde (4,71 m) og sette ny pers i høgde (1,43 m), fortel Sverre.
Også Sondre Herrevold (G17) persa i høgde, med heile 10 cm, sjå video av hoppet.
Mons Martin Borgen (senior) prøvde seg på ny pers, men kom seg ikkje over 1,91 meter. På 100 meter gjekk det betre, her blei det ny bestenotering med 11,58.
På osturn.no finn du alle resultata frå stemnet.
I kappgang gjekk Erik Tysse 3000 meter på 11,32, Joakim Sælen kom på 2. plass med tida 12,26. Nora Søreide (J10) frå Søfteland TIL gjekk 1000 meter på 6.08,8.
– Mykje kjekkare å vera på trening
Blant deltakarane Midtsiden snakka med på første stemnedag, laurdag, er Håkon Strømland Johnsen, som blant anna kom på 3. plass på 100 meter.
– Eg trente friidrett då eg var 8-9 år gamal og har nettopp byrja igjen. Eg er med på fleire greiner, det er for tidleg å velja spesialisering no. Men eg trur eg er best på 100 meter og spyd, seier Håkon.
Dei jamgamle kameratane Oskar Riis Gulbrandsøy og Erik Øye fekkogså premiar på stemnet.
– Det er veldig kjekt med stemne på heimebane, og at anlegget er blitt så fint. Det er mykje gøyare å gå på trening no enn før, seier dei to.
Til Barcelona neste månad
Utandørssesongen er snart slutt, men nokre av utøvarane i Os TF friidrett skal snart forlenga sommaren.
– I haustferien skal eit reisefølgje på 20, der 15 av dei er utøvarar, til Barcelona på treningsleir. Vi har vore der før og dei får nok ei flott oppleving, trur Mowinckel-Nilsen.
Her kan du lesa om, og sjå bildeserie, frå Os friidrett sin treningsleir i Barcelona i 2013.