Os får gule drosjar
– Vi trengte å samla oss om ein meir tydeleg profil, seier Tor Anders Hauge frå Os Taxi. No skal alle dei 17 drosjane bli gule og kvite.
Bildeserie:
Dei 17 eigarane i Os Taxi, som er registrert som eit samvirkeforetak (SA), ønskjer å framstå endå tydelegare som éi eining.
– Vi har merka auka konkurranse, ikkje minst på det vi tidlegare har hatt som fast kjøring, og har sett på ulike tiltak for at vi skal stå sterkare marknaden, seier Tor Anders Hauge.
Eit av tiltaka er ny og meir tydeleg profil.
– Det blei i grunnen ikkje så vanskeleg å få alle til å gå for same farge på bilane. Ei samrøystes generalforsamling gjekk inn for den nye profilen og at alle bilane i Os Taxi i framtida skal vera kvite med den gule profilen.
– Kvar er haldeplassen?
Kåre Mongstad frå Loops, som har levert den nye profilen, tok utgangspunkt i gult.
– Sjølv om det no ikkje er gule drosjar i Noreg, har jo drosjane rundt om i verda lange tradisjonar for å bruka gul som farge.
Også drosjebua skal skiltast tydelegare.
– Eg har høyrd at folk som går av bussen på Os terminal går og spør kvar drosjebua er. Det er eit tydeleg teikn på at ikkje berre bilane må bli meir synlege.
Om du ikkje er kjent i Os så ligg drosjebua på sjølve bussterminalen i sentrum.
Halvparten er ferdigdekorert
Rundt halvparten av drosjane i Os Taxi var kvite frå før, andre blir skifta ut ganske snart.
– Den eine, nummer 118, kom ny som kvit i går. Sjølv skal eg byta bil før jul, og det er det minst éin annan som skal.
– I løpet av året er nok 11-12 av 17 bilar som er kvite. Men også dei som er grå eller svart får også den nye profilen på.
Den nye profilen blir også gjennomgåande på nye heimesider, og ute hos verksemdene som er faste kundar hos Os Taxi.
– Vi har blant anna faste hentingar på Flesland, ofte der vi går inn med kunden sin logo og namnet på gjesten. Uansett skal det no bli endå enklare å finna ein drosje frå Os Taxi, seier Hauge.
Får for mykje respekt
Kvit og signalgul er ikkje heilt ulik politiet sin profil.
– Hender det at sjåførane føler at medtrafikantar oppfører seg som om det er politi i nærleiken.
– Ja, det har hendt at bilane framfor oss slakkar vel mykje av på farten, og hamnar langt under fartsgrensa, seier Christian Sande og ler.
– Det gjer ingenting om folk kjører meir varsamt, men det viktigaste er at vi no er synlege og lett å kjenna igjen.