Opplevde rask effekt av gjenopninga
– Det blir befriande å ikkje halvera utselte show, seier Veronica Søilen Halhjem.
– No slepp vi å senda dei leie meldingane til publikum om at dei ikkje kan koma grunna kapasitetbegrensningar. Dette skal bli ein gledens helg, seier Veronica Søilen Halhjem, frå Oseana.
Gårsdagens letting av koronatiltak har fått umiddelbar, positiv effekt for kulturhuset.
Merkbart billettsal
Etter at beskjeden kom om at restriksjonane blir fjerna, har Oseana allereie opplevd eit hopp i billettsalet.
– Vi merka tydeleg at salet til helgas forestillingar skaut fart, og vi har selt ut søndagens riksteater for born. Det er fantastisk å kjenna på at ting skal gå som normalt att.
Også Bjørn Tomren, som både er utselt og har ekstranummer med få ledige billettar, kan gå som normalt.
– No er jobben vår å sørgja for forsvarleg drift, å oppmoda alle om å prøva å halda meteren når dei oppheld seg i foajeen, påpeikar Veronica.
Meir forutsigbart
Det har ikkje vore lett å driva Oseana med tanke på at det stadig har vore endringar på restriksjonane.
Oseana har i store periodar valt å leggja alle billettane ut for sal til sine arrangement, men varsla dei som likevel ikkje fekk plass, med tilhøyrande refundering av pengar.
– For vår del har billettsalet måtta blitt løyst på denne måten grunna stadig endringar på restriksjonar. Vi har selt billettar som vanleg, men har måtta varsla kvar gong om at nokon ikkje har fått plass.
– Det var ein periode der det var eit fast antal på publikum som var lov, men stadige endringar gjorde den løysinga krevjande. No blir det endeleg meir forutsigbart for alle partar, avsluttar Veronica.
