Oppgraderte Smievågen
Os Kaiservice har nyleg avslutta sin del av arbeidet med oppgradering av friluftsarealet i Smievågen. Vegen går vidare til rekordmange oppdrag for dei Os-baserte sjøentreprenørane.
Bildeserie:
Det er trebrygger på jernbaneskjener det går mest av, men den nye strandpromenaden i Smievågen ved Moldaneset er bygd i naturstein og betong.
- Vi har merka ei kraftig auke i etterspurnaden når det gjeld natursteinskaiar, seier Jarle Øvreeide frå Os Kaiservice AS.
Fire faste
Etter nokre år med kaibygging for veteranen Helge Krydsby starta Øvreeide for seg sjølv. Os Kaiservice AS blei stifta, og Øvreeide kjøpte utstyret til Krydsby då han trappa ned. Hausten 2008 blei marknadsføring prioritert, med nye heimesider og deltaking på båtmessa i Bergen i starten av 2009.
- Det tok av med oppdrag i fjor, som var første år med fulltid på kaibygging heile året. Det gjorde at vi også måtte investera i ein del nytt utstyr, så no har arbeidsbåten fått trommel til betong, og vi har kjøpt bilar, motorisert trillebår og eigen kranbil.
- Helge er med oss når han har tid, elles er vi fire fast tilsette i selskapet og stort sett to innleigde utanom. I tillegg har vi fleire firma frå Os som ofte er med oss på oppdrag, fortel Jarle.
500 kvadrat før juni
På ein stor jobb på Valen, som skal vera ferdig i mai, blir det fire firma frå Os i full sving for å bygga strandpromenade og molo for ein privatperson.
- Vi skal bygga 300 kvadratmeter med mur i naturstein, og har skaffa oss eit eige steinbrot på Husnes til jobben.
Os Kaiservice kjem til å tangera totalomsetnaden frå 2009, som var på rundt 7 millionar kroner, allereie i mai i år.
Lengre strandveg
Kai, brygge og eigenproduserte flytebrygger som står i stil med kaiane er ikkje det einaste Øvreeide har på menyen.
- Med arbeidsbåten og den breie kompetansen blant våre tilsette kallar vi oss for sjøentreprenørar. Vi bygger, sveiser, forankrar og restaurerer, reparasjonar og vedlikehald av brygger og grunnmur på gamle naust er også blant det vi tilbyr kundane.
I Smievågen har Os Kaiservice nyleg avslutta eit av fleire oppdrag for Bergen og Omland Friluftsråd. Os kommune har spytta i rundt ein halv million kroner for oppgradering av området, som blir del av forlenga strandveg frå Mobergsvikjo via Lyngheim, Solstrand og Moldegård.
- Her kjem både skjelsand og toalett med tida. BOF er kjekk kunde å ha, vi har blant anna også vore på Skorpo på oppdrag for friluftsrådet. Slike plassar er viktig å ta vare på, seier Jarle Øvreeide.